Papa Francisco nia lia-menon molok harohan Angelus, 5 Juñu 2021
Maun no biin-alin sira, bondia!
Ohin, iha Itália no iha país sira seluk, selebra “Solenidade do Corpo e Sangue de Cristo”. Evanjellu aprezenta narrasaun Han-Kalan Ikus nian (Mc 14, 12-16, 22-26). Jezús nia liafuan no jestu sira kona ita-nia fuan: Nia foti paun, fó bensan, silu no fó ba eksolante sira, dehan: «Simu bá, ne’e ha’u isin» (v. 22).
Nune’e duni, ho simplisidade, mak Jezús haraik mai ita sakramentu boot liu. Ninia jestu mak jestu haraik an saran an nian, jestu partilla nian. Iha nia moris nia tutun, nia la fahe paun iha abundánsia atu habosu ema lubun-boot sira, maibé silu nia an rasik iha han-kalan paskál ho ninia eskolante sira. Halo nune’e, Jezús hatudu mai ita katak moris nia objetivu konsiste iha saran an, katak importante liu mak serví. No ohin ita hetan Maromak nia grandeza iha Paun baluk-oan ida, iha frajilidade ne’ebé naksulin iha domin no iha partilla. Frajilidade mak presizamente liafuan ne’ebé ha’u hakarak subliña. Jezús sai frajil hanesan paun ne’ebé silu no harahun. Maibé iha ninia frajilidade mak hetan ninia forsa. Iha Eukaristia, frajilidade mak forsa: forsa domin nian ne’ebé halo an ki’ik atu ema simu no la ta’uk; forsa domin nian ne’ebé silu no fahe atu habosu no fó moris; forsa domin nian ne’ebé harahun an atu halibur ita hotu iha unidade.
No iha forsa seluk ne’ebé sobresai iha Eukaristia nia frajilidade: forsa atu hadomi ema ne’ebé naksala. Iha kalan ne’ebé ema saran nia, Jezús haraik mai ita Paun moris nian. Nia haraik mai ita don boot liu enkuantu sente iha nia fuan kuak naruk liu: eskolante ida ne’ebé han ho Nia, ne’ebé serví bikan hanesan, atraisoa Nia. No traisaun mak terus boot liu ba ema ne’ebé hadomi. No Jezús halo saida? Reaje ba aat ho di’ak ida boot liután. Nia hatán ba Judas nia “lae” ho “sim” mizerikórdia nian. Nia la kastiga ema maksalak, maibé fó moris tanba nia, selu ba nia. Bainhira ita simu Eukaristia, Jezús halo hanesan mai ita: nia koñese ita, hatene katak ita ema maksalak no hatene katak ita halo erru barak, maibé la renunsia atu halo nia moris sai ida ho ita-nian. Nia hatene katak ita presiza ida-ne’e, basá Eukaristia la’ós prémiu ba santu sira, lae, ne’e mak Paun maksalak sira-nian. No tanba ne’e mak nia ezorta ita: “Imi keta ta’uk! Simu no han bá!”.
Bainhira ita simu Paun moris nian, Jezús fó sentidu foun ba ita-nia frajilidade sira. Nia fó hanoin katak ba Nia matan sira ita folin liu duké ita hanoin. Nia dehan mai ita katak Nia haksolok bainhira ita partilla ho Nia ita-nia frajilidade sira. Nia repete mai ita katak Ninia mizerikórdia la ta’uk ita-nia mizéria sira. Jezús nia mizerikórdia la ta’uk ita-nia mizéria sira. No liuliu, kura ita-nia frajilidade sira ho domin, frajilidade sira ne’ebé ita labele kura mesak. Frajilidade sira ne’ebé loos? Mai ita hanoin. Ida kona-ba rai kunan ba sira ne’ebé halo aat mai ita, ita labele kura mesak; ida halo distánsia husi ema seluk no izola an iha an rasik, ita labele kura mesak; ida tanis ba an rasik no lamenta hodi la hetan dame, ne’e mós ita labele kura mesak. Nia mak kura ita ho ninia prezensa, ho nia Paun, ho Eukaristia. Eukaristia mak ai-moruk efikás kontra taka-an sira-ne’e. Defaktu, Paun moris nian kura laran-toos, hodi tranforma iha dosilidade. Eukaristia kura tanba halo ita ida de’it ho Jezús: halo ita asimila ninia modu moris nian, ninia kapasidade atu silu an rasik no saran an ba maun-alin sira, atu hatán ba aat ho di’ak. Nia haraik aten-brani atu sai husi ita an rasik no atu hakruuk ho domin ba ema seluk nia frajilidade sira. Hanesan Maromak halo ho ita. Ne’e mak lójika Eukaristia nian: ita simu Jezús ne’ebé hadomi ita no kura ita-nia frajilidade sira atu hadomi ema seluk no atu tulun sira iha sira-nia frajilidade sira. No ida-ne’e, durante moris tomak. Ohin, iha Liturjia Oras nian, ita resita inu ida: versu haat ne’ebé halo rezumu Jezús nia moris tomak. Dehan mai ita katak, bainhira moris, Jezús sai kompañeiru viajen iha moris; depois, iha han-kalan, nia saran an nu’udar ai-han; tuirmai, iha krús, iha nia mate, nia sai “presu”, selu mai ita; no oras-ne’e, hodi ukun iha Lalehan, nia mak ita-nia prémiu ne’ebé ita bá foti, ne’ebé hein ita.
Atu Santa Virjen, iha-ne’ebé iha nia Maromak halo an ba ema, tulun ita simu ho fuan ne’ebé agradese don Eukaristia nian no atu halo ita-nia moris mós prezente ida. Atu Eukaristia halo ita don ida ba sira seluk.
