Fatumaka – Loron 16-7-2022, ami irmán sira komunidade St. Teresa d’Avila Baucau, hala’o peregrinasaun ba Santuario Maria Auxiliadora Fatumaka, hamutuk ho animador sira sentru Baucau nian, ADMA, AJA, OPIAM no komunidade edukativa sira. Iha orasaun Rosário peregrina nian tulun ami idaidak atu komtempla Maria nia virtude sira, hodi agradese Maromak ba di’ak hotu ne’ebé haraik ona ba Institutu iha tinan 150 nia laran ne’ebé realiza iha misaun Salesiana.
Hafoin kontinua ho selebrasaun penitensial iha ne’ebé oferese simbol oioin atu tulun ema idaidak rekoñese no hakribit sala, fó perdaun no simu fali perdaun, hodi hakbesik-an ba Sakramentu konfesa atu manan Maromak nia laran sadia no Nia Grasa, atu kontinua habelar Maromak nia domin liu husi ami nia karizma.
Peregrinasaun taka ho Eukaristia Santa ne’ebé prezide husi Pe. David Savio SDB, no iha homilia haktuir katak peregrinasaun ida ne’e prepara ba festa 150 anos Institutu Filhas de Maria Auxiliadora, nune’e ita agradese ba moris Institutu FMA nian ne’ebé Don Bosco no Madre Mazzarello hala’o iha mundu ne’e. Hanesan iha Evanjello dhn: “Ha’u hadomi tebes, ksolok Ha’u klamar nian……Nia sei haklaken justisa ba mundu tomak”. Jesus buka hadi’a no promove relasaun di’ak entre ema ho Maromak, ema ho ema, tanba wainhira relasaun di’ak ita bele moris iha justisa. Nune’e DB no MM hahu Institutu ho Espiritu Santu nia serbisu hodi taumatan ba labarik no foinsa’e sira klamar, maibé uluknanain kuda santidade iha familia ida ne’e atu bele lori roman no liberdade ba labarik ho foinsa’e sira, atu sira bele hetan salvasaun. Ho selebrasaun tinan 150 konvida mós ami nu’udar FMA atu kontinua misaun Institutu nian ho laran manas hodi lori roman, domin no liberdade ba abandonadu sira.
Sr. Onesiana
