Baucau – Ohin loron 21 fulan outubru 2018 komunidade Santa Teresa D’Avilla 
hamutuk ami-nia destinariu sira: ADMA, Antigu/a alunu no oratorianu sira husi sentru Dewake no Teulale nst… hamutuk agradese ba Maromak ba grasa hotu ne’ebé Nia harak ba ema ida-ida durante tinan 2018 ne’e nia laran, no mós agradese ba malu ba prezensa fraterna ema ida-ida nian ne’ebé nu’uda don ba malu liuhusi servizu no kolabora hamutuk ba Maromak Nia Reinu.
Festa ne’e nia lalaok maka uluk knanain, 4.30, Santa Misa ne’ebé selebra husi amo Paroku Pe. Manuel Ximenes, SDB. Durante santa Misa ne’e Pe. Manuel agradese ba aman-inan ne’ebé haruka sira-nia oan sira ba Kreda no mós ba Oratoriu. Hafoin nia halo sitasaun husi Evanjellu Domingu nian dehan: ohin ita rona katak joven na’in rua ne’e husu atu tur iha Jezús nia sori-sorin, tanba sira haree katak iha buat di’ak mai husi Jezús, maibé Jezús hatan katak atu tur iha nia sorin la’os buat ida fasil. Nune’e ita labele hein de’it ka husu de’it Jezús atu lori kedas ita-nia oan sira ba lalehan, moris ne’e presiza turi nia prosesu moris nian, nune’e mak dehan liuhusi formasaun sira no atividade sira ne’ebé Kreda kria ida mak liuhusi Oratoriu, infansia misionaria, grupu Laura vicuña, animador sira, no ADMA no nst…
Tuir mai atraksi badak prezenta husi oratorianu sira sentru rua ne’e, Infansia misionaria, animadór sira husi sentru Tiulale.Depois hotu tiha programa dansa no kanta sira, sei iha mós fratenizasaun (han hamutuk). Fratenizasaun ne’e furak no gustu liu tanba kontribuisaun mai husi hothotu, sira ida-idak lori depois tau hamutuk hafoin fahe fila fali sira hodi han hamutuk, tanba gostu mós kahur malu oituan maibé haree katak ema hotu haksolok tanba iha festa ne’e kompleta liu mak iha “PAUN no LALEHAN” nu’udar don Bosco toman.
Festa ne’e hotu kuaze tuku 7.30, agradese tebes ba ema hotu nia prezensa fraterna.
(Lucia Pereira)
