Dili – Komunidade Edukativa husi Eskola Maria Auxiliadora- Komoro, halibur atu selebra festa ksolok Gratidaun ne’e hamutuk. Ir. M. Brigida ho profesor hamutuk ho estudantes sira husi terseiro ciclo nian, mak responsavel ba koro, iha Misa solene ne’e. Ho sira nia entuziasmu no haksolok, anima kantu iha selebrasaun ne’e.
Molok festa, irman sira preokupa uituan, tamba fatin atu selebra Santa Misa, iha gym la to’o ba alunus sira husi pre-eskolar to’o iha estudante husi terceiro ciclo, ne’ebe ho numero 1073, aumenta tan profesores sira. Tamba husu iha parokia, maibe dadersan okupa ho selebrasaun sira, nune’e imposivel atu selebra Misa iha parokia, no mos irman sira la hetan amululik atu selebra, maibe ho fiar ba providenza, ikus mai, hetan pe. Mario do Rosario, SDB, ne’ebe’ maske nia orario nakonu ho lisaun sira, maibe nia hatan no fo tempu atu selebra Misa Solene ida ne’e.
Santa Misa hahu iha oras tuku 10:00 am, hahu ho liafuan maklokek: ”Agradesementu mak Don ida, ne’ebe’ mai husi Espiritu Santo, no husu hodi deskobre Nai Nia kmanek hotu, ne’ebe’ halo tiha ona iha Madre Yvonne ninia moris, nu’udar sentru unidade nian iha Instituto hodi buka Kreda nia diak. Santa Misa ne’e, mak prezente boot agradese nian husi alunus no membru komunidade edukativa, especialmente husi FMA ida-idak nia fuan, hamutuk iha espiritualmente ho labarik, foinsa’e no komunidade edukativa iha Ispettoria Maria Imaculada Belflower- California nian, iha loron furak Agrasimento Mundial ba Madre Jeral doben.
Momentu furak, maske hotu-hotu sena-malu iha gym, maibe selebrasaun la’o ho diak, alunus sira hotu partesipa diak. Durante homilia, pe. Mario fo komentario kona ba festa ohin nian hodi dehan:” Festa Agradesemento ba Madre Jeral FMA, ne’ebe’ laran diak no hatene hadomi, nune’e nia haruka nia oan FMA sira hela iha ne’e no loke eskola, atu bele tulun labarik barak sai diak. Nune’e, presiza agradese nafatin ba Maromak, ba Jesus Moris Hias, ne’ebe’ haruka nia belun sira atu servizu makas ba labarik no joven sira nia diak, fo esperansa no futuro ne’ebe’ diak”.
Selebrasa hotu tiha, alunus sira hamutuk profesores no irman sira, simu merenda simples, hodi remata festa hamutuk nian. Ne’e mak loron grasa nian, tamba ami bele selebra festa ksolok ne’e hamutuk nu’udar komunidade edukativa no familia boot ida!
Husu Fuan Ami hotu hato’o “ Boas Festa” ba Madre Jeral, Madre Yvonne doben.
(Comunidade B. Eusebia Palomino – Comoro Dili)
