Leitura sira domingu ne’e nian komplementa malu atu aprezenta koordenada fundamentál rua atu hodi harii família sarani: domin ba Maromak no domin ba ema seluk, liuliu sira ne’ebé besik liu ita – inan-aman sira no familiár seluk.
Evanjellu subliña, liuliu dimensaun Maromak nia domin nian: Maromak nia projetu tenke sai prioridade ba naran sarani ida, ezijénsia fundamentál, no ezijénsia seluk submete ba nia. Família sarani harii iha respeitu absolutu ba projetu ne’ebé Maromak iha ba ema ida-idak.
Leitura daruak subliña dimensaun domin nian ne’ebé tenke suli husi ema hotu nia jestu, ema sira ne’ebé moris “iha Kristu” no aseita atu sai Ema Foun. Domin ne’e tenke atinje, ho forma espesiál, sira hotu ne’ebé ho ita partisipa iha espasu familiár no tenke tradús iha atitude sira kompaixaun nian, komprensaun nian, laran-di’ak nian, respeitu nian, partilla nian, servisu nian.
Leitura dahuluk aprezenta, ho forma prátika liu, atitude ruma ne’ebé oan sira tenke iha ba inan-aman sira. Ne’e mak forma ida atu konkretiza domin ne’ebé leitura daruak ko’alia.
