13 Maiu
SANTA MARIA D. MAZZARELLO
Evanjellu Lucas 10,21-28
«Iha oras ne’ebá Nia haksolok teb-tebes ho Espíritu Santu, dehan: “Ha’u hanai Ita, Aman, basá Ita subar tiha buat sira ne’e husi ema matenek sira hodi fó hatene fali ba sira ne’ebé ki’ik. Loos duni, Aman, Ita hakarak nune’e. Ha’u nia Aman saran tiha buat hotu mai Ha’u. Ema ida la hatene sé mak Oan, Aman de’it mak hatene; no ema ida la hatene sé mak Aman, Oan de’it mak hatene, no ida ne’ebé Oan hakarak fó hatene ba nia.” Hafoin, fila oin ba nia eskolante sira, Nia dehan: “Rahun di’ak ba sira ne’ebé haree buat ne’ebé imi haree. Basá Ha’u dehan ba imi katak profeta no liurai sira uluk nian hakarak haree buat ne’ebé imi haree, maibé sira la haree; no rona buat ne’ebé imi rona, maibé sira la rona”. Tuir mai, doutór ukun-fuan nian ida hamriik hodi dehan atu koko Nia: “Mestre, ha’u sei halo sa ida atu hetan moris rohan-laek?” Jezús dehan ba nia: “Iha ukun-fuan hakerek saida? Ita lee oin sá?” Nia hatán: “Ó sei hadomi Na’i, ó-nia Maromak, ho neon ho laran tomak, ho ó nia kbiit tomak, ho ó nia hanoin tomak; no mós ó-nia maluk nu’udar ó-nia an rasik.” No Jezús dehan ba nia: “Ita hatán loos; halo nune’e, ita sei hetan moris”».
Reflesaun
Motivu hakfodak ka admirasaun Jezús nian mak Maromak nia mistériu ne’ebé la hatudu ba ema matenek maibé ba ki’ik-oan sira {kf v 21). Maromak nia mistériu hakat liu ema nia koñesimentu maibé nakloke ba ki’ik-oan sira, ba sir ane’eb’e iha fuan moos no haraik-an no hatene simu buat hotu nu’udar don gratuitu. Jezús hakarak atu ninia dixípulu sira sai mós ki’ik sira-ne’e.
Haraik-an mak karakterístika ida evidente liu Maria Domenica Mazzarello nian. Ne’e mós mak atitude ne’ebé Jezús hakarak haree iha ninia dixípulu sira: “Imi aprende husi ha’u ne’ebé laran-maus no haraik-an” (Mt 11,29). Nia la husu ba dixípulu sira atu imita Nia iha halo milagre sira, ka iha hanorin ho autoridade, maibé hakarak atu iha sintonia iha fuan ho Nia. Fotografia rekordasaun nian ne’ebé Jezús entrega ba ninia kreda bainhira remata ninia misaun iha mundu ne’e aprezenta nia ho aventál no basia, hakruuk iha dixípulu sira nia ain atu fase sira ain. “Ha’u fó ezemplu ba imi” (Jo 13,15). Buat ne’ebé Jezús hakarak marka metin iha sarani sira tempu hotu nia fuan mak ezemplu servisu haraik-an nian, doasaun umilde, domin iha haraik-an. Saun Paulo kapta didi’ak Jezús nia hakaran, Iha Surat ba Filipense sira nia hanorin sarani sira nune’e: “Imi iha sentimentu hanesan ho Jezús nian iha imi an” (Fil 2,5), hafoin nia aprezenta knananuk furak liu ne’ebé deskreve Kristu “hamamuk an rasik, hodi foti atan nia kondisaun… halo an ki’ik liu hodi obedese to’o mate no mate iha krús” (Fil 2,6s). Sai haraik an tuir Jezús nia ezemplu ezije hamamuk an, la tau an iha sentru hodi manán foti-an, autosufisiénsia, kaan ba ukun no ambisaun atu sai primeiru. Ba ki’ik-oan sira mak Aman hakarak revela beleza ninia Reinu nian.
