Laga – Loron 20/06/2017, enkontru juniores zonál (Venilale, Laga, Baucau no Fuiloru) halo iha Komunidade Beata Laura Vicuña – Laga. Tema ba enkontru ne’e Madre Alma Catagna – Provinsiál TIN foti husi Madre Mazzarello nia surat: ”Feto relasaun nian tuir Maria nia estilu”.
Iha Madre nia konferénsia tulun ami atu aprende husi Madre Mazzarello, tanba ninia prezensa akompaña istória Institutu nian. Husi kiik kedas nia aprende husi “Jezús laran maus no haraik-an” no nia hateke ba Maria ho domin oan feto nian, atu bele eduka ema seluk atu tau matan ba aspetu oan nian, fraternu nian no inan nian. Ho ida ne’e konvida ami koko haree Maria no Madre Mazzarello nia kapasidade relasaun nian, hodi reflete kona ba karakteristika sira tuir mai ne’e:
- Simplisidade fuan nian: Relasaun hotu nia hun mak fuan no atu bele kria relasaun di’ak ida labele haketak ita nia fuan. Iha Na’in Feto nia fuan bele kontempla laran moos, iha nia buat hotu unifika ona, katak depende tomak husi Maromak ne’ebé hariku Maria ho Ninia grasa. Iha Madre Mazzarelo nia buka ida deit: hadomi Jezús, haksolok ho Ninia domin, fó ksolok ba ema sira ne’ebé Maromak entrega iha ninia liman.
- Haraik-an atu serbi: Maria nia atitude ‘’Ha’u mak ne’e, ha’u mak Na’i nia atan’’ (Lk 1, 38) sai mós madre Mazzarello ninian: nia haksolok bainhira bele serbí no bainhira hamriik iha fatin ikus.
- Atitude simu nian: Maria simu Anju ne’ebé mai haklaken mistériu Enkarnasaun nian, maibé mós simu Jezús nu’udar Oan no loke nia fuan ba solidariedade hodi ba hasoru Isabel. Madre Mazzarello nia hateken fó valor ba ema, simu ninia kapasidade sira no kontribui atu hadi’ak limitasaun no frakeza sira.
- Husik ema seluk hariku ha’u: Madre Mazzarello iha kapasidade boot atu konfronta an ho ema seluk, simu ema seluk nu’udar prezente, rona sira nia hanoin no simu ho gratidaun sira nia kontribuisaun.
- Domin nia intuisaun: Iha ita kontempla Maria ne’ebé iha intuisaun kona-ba buat ne’ebé falta, maski ema la interpela nia, nia haree no koalia: ‘’Tua la iha ona’’ (Jo 2, 3), Iha Madre Mazzarello nia moris ita bele haree domin nia intuisaun sira, valor ida ne’ebé importante liu ba sira ne’ebé eduka.
- Orasaun nu’udar dinámika relasionál: Maria rai buat hotu iha ninia laran (kf Lk 2, 19-51), iha Madre Mazzarello, nia mak inan ho fuan ne’ebé reza.
Depoizde konferénsia madre fó serbisu ba ami halo nu’udar pessoál no grupu. Ida ne’ebé kona-ba grupu ami sharing iha grupu hafoin ba aprezenta iha asembleia.
Nu’udar konkluzaun Madre dehan buka atu hametin malu iha karidade no nafatin konfronta-an ho Konstituisaun. Ikus liu, ami ibun dehan obrigada ba Madre, ami fuan mós sente. Husi ami nia parte haka’as an atu moris, la’os fasil maibé ho Maromak, bele.
(Maria Sarmento no Agata Freitas)
