Venilale – Festa agradesimentu eh gratidaun mak rikusoin ida ne’ebé Don Bosco husik hela, husu atu nu’udar komunidade hasae hahi no agradese ba Maromak ba buat di’ak hotu ne’ebé simu husi Maromak no husi maluk sira durante tinan tomak nia laran. Tan ne’e iha loron 21 Dezembru, komunidade Edukativu Madre Mazzarello Venilale hamutuk ho estudante tomak selebra festa gratidaun ne’ebé prepara husi finalista sira ho tema “ HAMUTUK HO MARIA AMI AGRADESE”.
Festa gratidaun ida ne’e hahu ho Eukaristia santa ne’ebé selebra husi Pe. Abrao Pinto Soares SDB. Iha omilia, Amu selebrante hateten ba finalista sira na’in neen nulu resin lima (65) katak; Festa agradesimentu mak momentu ida atu agradese Maromak ba buat diak hotu ne’ebé ita simu no momentu ida atu agradese mós ba ema hotu ne’ebé responsavél ba imi-nia edukasaun liuliu ba inan-Aman no manorin na’in sira. Festa agradesimentu mós momentu ida atu husu perdaun ba Maromak no husu perdaun ba ita-nia maluk sira ne’ebé ita halo sala hasoru sira. Hafoin amu selebrante hatutan tan katak; festa agradesimentu ne’e mak momentu ikus ba finalista sira. Nune’e tempu to’o ona ba finalista sira atu halo misaun ida. Hanesan Maria ita Inan lori ksolok ba nia prima Isabel nune’e imi lori Maromak ba sosiedade no mós lori ksolok ba sosiedade. Haka’as an atu hadook an husi tentasaun no halo buat di’ak 
ne’ebé aprende iha fatin ne’e. Nafatin kontaktu ho Maromak, basá la ho Maromak buat hotu la’o sala dalan, buat hotu iha nakukun nia laran. Ho Maromak buat hotu iha naroman, ho Maromak matenek hotu sai di’ak.
Hafoin depoizde Eukaristia, finalista sira entrega rezultadu projetu ne’ebé sira halo nu’udar rekordasaun mak fatin tuur atu estuda no fatin tuur iha tempu rekreiu nian ba Padre kapelaun, diretora komunidade nian Ir. Carolina Correia FMA, diretora eskola Ir. Anita Freitas FMA no mos ba mestre/a sira hotu liu husi simbolu tesi-fita.
Iha momentu ne’e mós Ir. Carolina nu’udar diretora komunidade nian fó lia menon ba finalista sira katak: “ banhira imi mai foufoun ho bornal mamuk, maibé ohin imi remata ona imi-nia estudu iha ne’e no fila ho bornal rua, bornal ida teoria ninian no bornal ida fali pratika ninian. Imi-nia bornal nakonu ho osan mean no osan mutin ne’ebé ense husi imi-nia mestre/a sira. Atu uza osan mean no osan mutin ne’e iha sosiedade no ba kreada ka soe osan-mean no osan-mutin ne’e hirak ne’e depende ba imi”.
(Alice Filipe)
