Baucau – Ohin, 29 Dezembru 2018, ami komunidade Santa Teresa D’Avila Baucau selebra festa Santu Natal 2018 hamutuk ho ami-nia família. Família sira to’o ho kontente, Irmán sira hotuhtotu hein hodi simu no kumprimenta sira. Objetivu ba festa ida ne’e mak atu ami-nia família sira hatene ami hela iha ne’ebé no mós atu sira bele koñese malu. Maske sira balun koñese malu ona. Iha festa ne’e maske ami Misa laiha tanba Padre SDB sira mós ba halo festa Natal hamutuk iha Maliana, maibé ho orasaun simples ne’ebé halo família sira mós partesipa ho di’ak.
Maibé, molok selebrasaun orasaun nian, Ir. Sanzinha nu’udar superiora komunidade nian hato’o lia menon ruma ba ami-nia família sira, no esplika ba sira objetivu festa ida ne’e. No aprezenta Irmán ida-ida nia família, hanesan Ir. Josefa husi Gariwai, Ir. Ana Cesatina de Jesus husi Gariwai, Ir. Ana Ivonia husi Samalari, Ir. Lucia husi Quelicai, no Ir.Sanzinha husi Lospalos. Hotu tiha orasaun, família sira tulun hodi tau sai hahan sira ne’ebé sira lori husi uma mai, hodi tau hamutuk hafoin ema hothotu kontente hodi han hemu ho ksolok. Nu’udar komunidade ami prepara de’it bee no bikan, maske nune’e hahan resin barak liu, ne’ebé mak halo fali ba ami-nia han kalan nian.
Família sira hotu kontente tanba la’o besik no mós ema oituan de’it, nune’e entre sira bele koñese malu di’ak liután, no mós iha tempu atu ko’alia ho oan sira liuliu Irmán sira. Entre família sira ne’e ida dehan: hanesan ne’e mak di’ak liu, la preokupa ba buat barak, ita to’o sei iha tempu atu ko’alia ba malu. Depois dehan tan, se hanesan ne’e nafatin di’ak liu. Hotu tiha han meudia sei iha tempu barak atu ko’alia ho sira-nia oan sira. Bele dehan katak maske simples maibé fuan nakonu ho ksolok no gratidaun ba ami-nia família tanba sira hothotu mai.
(Lucia Pereira)
