Casssa 22-07-2022, hamutuk ho festa santa Maria Madalena, komunidade Madre Rosetta Marchese ho ksolok selebra ho solene festa tinan 150 “Instituto Filhas de Maria Auxiliadora” nian. Selebrasaun hahu ho santa missa, partisipante sira mak, oratoriano, alunus sira, kolaboradores no inan – aman sira. Missa selebra husi padre vigario Parokia Ainaro nian, Padre Eugenio Redentor, iha nia homilia dehan: “hanoin ba Maria Madalena nia moris antes ne’e la dun diak, maibe wanhira hasoru tiha Jesus nia moris ne’e troka. Maria Madalena mos hasoru problema, nia sente lakon wanhira Jesus mate. Nia simu bolun atu tuir Jesus hodi sai dixipulo, no ema dahuluk ne’ebe hare Kristo moris hias. Nia mak ida ne’ebe fiel liu hamutuk ho Maria Jesus nia inan hodi akompaña Jesus nia terus hotu.
Hanesan mos Maria Mazzarello, hamutuk ho nia feto maluk nain 11, ne’ebe hatan sira nia SIM ba Maromak hodi saran an tomak ba labarik no foinsa sira ne’ebe kiik no kiak liu iha nia tempu. Hau hanoin iha tempu ne’eba laos fasil hanesan ohin loron. Maibe, situasaun ne’e hotu Maria Mazzarello simu no haré ho matan fiar nian. Nia rona Jesus bolu nia naran hanesan temi Maria Madalena nia naran. Jesus hakarak Maria Mazzarello hola parte iha Nia misaun salvasaun nian. Tan ne’e, ita mós agradese ba Madre FMA sira nia prezensa iha Cassa. Ita reza ba sira, atu sira nia misaun ne’e bele sai buras liutan.
Nu’udar FMA, ami husi comunidade Madre Rosetta Marchese iha misaun foun ne’e, agradese tebes Maromak, ba labarik, adolexente, foinsa’e no familia sira ne’ebé hakonu iha ita nia misaun, no sente hola parte iha ami nia moris. Agradese tebes ba Madre Mazzarello no irman dahuluk sira nian Sim, no FMA hotu husi jerasaun ba jerasaun ba sira nia korajem, nakonu ho sakrifisiu sira, hodi kanta sira nia fidelidade iha tempu ksolok no mos tempu difisil sira, nune’e to’o ohin fini ne’e kontinua moris no buras, no ami mos koñese fini ne’e, no hola parte iha fini ne’e, moris nu’udar FMA ida haksolok no korajem la’o ba oin iha misaun loro-loron.
Depois de missa, kontinua festa ho animasaun, fahe presente ba mánan nain sira ne’ebe partesipa iha atividades sira iha preparasaun ba Festa hanesan: quiz, Tik-Tok, Poezia, Pinta dezeñu, no koreografia ba músika 150 anos nian, hafoin merenda hamutuk no fahe malu.
(kom. Madre Rosetta Marchese, Cassa)
