Cassa, 10 Fevereiru 2022. Komunidade Madre Rosetta Marchese, ne’ebe’ komposta husi irman sira (Armenia, Teresa no Sebastiana), hahu apostoladu vizita família sira iha kampung sira. Nu’udar Moto iha misaun ne’ebe hahu ona foti naroman husi pasajem Saun Mateus “Bibi luhan kiik, keta tauk, basa imi Aman, hakarak haraik reino ne’e ba imi (Lk.12,32).
Dadersan, ami (FMA) hamutuk ho katekista Julito halo viajem ba kampung Dirukede (signifika Ai-kadiru hun ida), kampung ne’e, mak fronteira entre suku Cassa no parte Zumalae, iha uma kain 50 deit.
Ami to’o iha Dirukede ami husu katekista atu akompaña ami ba vizita uma ida-ida, maibe wainhira ami to’o sarani sira balun hein ona iha katista Agostinha nia uma, tanba agora tempu halo natar nian, nune’e família barak ba ona servisu iha natar, tan ne’e kateksta halibur sira iha nia uma deit, atu madre sira bele koalia ba sira.
Nune’e, irman Sebastiana ko’alia ho sira hodi apresenta ita nia komunidade FMA nia prezensa iha Cassa. Irman apresenta mos se mak Madre FMA sira ho nia misaun espesifiku, irman koalia oituan kona ba moris família sarani nian hodi husu inan aman sira nia responsabilidade atu akompaña oan sira iha moris fiar nian no konvida sira atu haruka oan kiik sira tuir Katikeze ba preparasaun hodi simu sakramentu, tulun oan sira ne’ebe simu primeira Komuñaun atu partisipa misa domingo no loron bo’ot. No ba sira ne’ebe barlakiadu irman husu atu inan aman ajuda sira atu hakbesik an ba sakramentu matrimoniu. Tanba sakramentu mak lori grasa Maromak nian hodi hakonu iha familia laran: damen, domin no unidade atu nune’e bele eduka oan sira.
Molok atu fahe malu sarani Dirukede sira oferese merenda ba irman sira.
Wainhira fila mai Cassa iha dalan katekista konvida irman sira han meu-dia iha nia uma, família sente kontente ho irman sira nia prezensa ne’ebe simples no habelun.
Apostulado vizita familia sira mak momentu furak atu koinese besik liu tan família sarani sira nia moris, nune’e bele lao hamutuk iha dalan fiar nian, Dirukede mak Aldeia ne’ebe do’ok husi Igreja Cassa nune’e susar ba sira atu partisipa iha missa Domingo.
Maromak hadomi nafatin nia povu ne’ebe besik ka do’ok, no Nia husu ita atu kontinua lao hamutuk ho Nia povu.
(Teresa de Carvalho FMA)
