RV – Iha katekeze kuarta, 26 Outubru, Papa Francisco kontinua reflesaun kona-ba obra korporál mizerikórdia nian. Obra ne’ebé nia ko’alia kona-ba mak “bainhira ha’u la’o rai imi fó mahan mai ha’u; bainhira ha’u isin tanan imi fó hatais ha’u”.
“Krize ekonómika, konflitu armada no mudansa klimátika obriga em barak atu emigra. Maski nune’e, migrasaun sira la’ós fenómenu foun ida, maibé pretense ba istória umanidade nian. Falta memória istórika atu hanoin katak ne’e mak karakterístika ita-nia tinan sira nian”, Amu-Papa dehan, hodi sita nu’udar ezemplu epizódiu bíbliku sira, hanesan ida Abraun nian, povu Israel nian no Jezús rasik nia família. “Umanidade nia istória mak istória migrasaun nian: iha latitude hotu, la iha povu ne’ebé la hatene fenómenu mogratóriu”.
Krize ekonómika hamosu atitude taka an nian no la’ós ida simun nian. Iha parte balun mundu nian, ema harii muru no barreira sira. Instintu egoista halo sai naukukun serbisu husi ema sira ne’ebé esforsa an atu asiste migrante sira. Maibé taka-an la’ós solusaun ida; iha kontráriu, favorese tráfiku kriminozu sira nian. Solusaun ida mesak mak ida solidariedade nian, iha-ne’ebé sarani sira simu bolun ho modu urjente.
“Ne’e mak kompromisu ida ne’ebé envolve mundu tomak, la esklui ema ida. Dioseze sira, parókia sira, institute sira vida konsagrada nian, asosiasaun sira no movimentu sira, simu bolun atu simu maun no biin-alin sira ne’ebé halai husi funu, hamlaha, violénsia no kondisaun moris la umanu. Ita hotu hamutuk mak forsa boot ida amparu nian ba ema ne’ebé lakon pátria, família, serbisu no dignidade”.
Tuirmai, Amu-Papa komenta obra korporál fó hatais ema isin-tanan sira. Fó hatais ema isin tanan katak fó hikas fali ema nia dignidade.
“Ita hanoin mós ba feto sira vítima tráfiku nian, soe iha lurón sira eh ba ema seluk, modu demais atu uza ema nia isin nu’udar merkadoria, té labarik sira no adolexente sira nian. Ho modu hanesan, la iha serbisu ida, uma ida, saláriu justu ida, eh hetan diskriminasaun tanba rasa eh tanba fiar mak forma hotu “isin-tanan nian” no hasoru buat ne’e, nu’udar sarani, ita simu bolun atu sai atentu no pronto ba asaun”.
“Maun no biin-alin sira, ita keta monu iha armadillo [hani] taka-an nian iha an rasik, indiferente ba maun-alin sira nia nesesidade sira no preokupa de’it ho ita-nia interese sira. Presizamente iha medida ita aloke an ba ema seluk mak moris sai fekundu, sosiedade sira manán hikas dame no ema sira rekupera ninia dignidade nakonu”.
