Kongresu Família DIoseze Baucau (16-20 Setembru 2015)
Viqueque – Dioseze Baucau organiza Kongresu Família ho tema “Fó tempu uitoan ba família” iha Viqueque. Loron abertura nian marka ho selebrasaun eukarístika, iha tuku 18.30, prezide husi D Basílio do Nascimento hamutuk ho pároku sira husi dioseze Baucau, Dili no Maliana. Hafoin ho serimónia abertura iha-ne’ebé D.Basílio loke ho modu ofisiál kongresu ne’e. Prezente iha abertura kongresista sira husi Dioseze Baucau no reprezentante sira husi Dioseze Dili, Maliana, grupu kategoriál no konfisaun relijioza sira seluk. Pontu importante ne’ebé Amu Basílio fó sai iha Abertura bele rezumu hanesan tuirmai ne’e:
KONTESTUALIZASAUN:
- Família nu’udar nesesidade primordiál ida, [problema família la’ós problema ema katóliku nian de’it]. Família eziste ka hari’i antes Kristu – nu’udar kontratu ida entre mane ida ho feto ida,atu dehan ba públiku katak sira rua pertense ba malu;
- Família nu’udar núkleu, sélula no fundamentu ba sosiedade. Jezús rasik mós mai husi família ida.
- Kreda nu’udar assembleia ne’ebé halibur an iha Kristu, ita ema mak sai kreda nee.
- Sakramentu Bapizmu (ne’ebé ema ida-idak simu) mak sai fundamento ba sakramentu seluk, iha kazu ida nee, Sakramentu kaben (ne’ebé ema nain rua simu malu sai ida deit) – nune’e halo família sai sakráriu / templu doméstiku. Jezús Kristu mak fó orientasaun ba moris iha família, uniaun ida ne’e halo feto no mane kompleta malu hodi hatutan Na’i Maromak nia planu, mulitiplika ema ba sosiedade no hakiak relasaun entre ema iha sosiedade. Wainhira família iha problema, signifika sosiedade mós iha problema.
OBJETIVU KONGRESU NIAN:
- Liafuan Kongresu mai husi lia-latin ne’ebé dehan “Co-ingredire” [tama hamutuk], ho “co- egredire” [sai hamutuk]. Assembleia Congresso ida nee reflete hamutuk, hanoin, reza, haree ba uma laran rasik hodi identifika problema no realidade ne’ebé nia hasoru,
- Buka dalan foun, analiza, hodi fó resposta ba problema ne’ebé família hasoru: desafiu sira ne’ebé hakarak sobu família iha rai ida ne’e, iha tempu ida-ne’e, no iha kreda ida-ne’e…
- Atu nune’e bele iha nafatin fidelidade ba Kristu nia hanorin: “Buat ne’ebé Maromak tau hamutuk, ema ida la bele hafahe”.
DEZAFIU NE’EBÉ FAMÍLIA HASORU:
- Efeitu husi konseitu foun ba família ne’ebé fo definisaun foun ba família:la’ós ona família norma-constitutiva, maibe família hanesan uniaun entre ema rua, [sem definisaun ema nee feto ka mane]
- Kestaun de fidelidade ba malu nu’udar fen ho laen
- Kultura ne’ebé valoriza ema hanesan sasan ne’ebé bele troka ou uza enkuantu sei util
- Domin [sei vale ka lae?] nu’udar fundamentu atu hari’i família: la’ós tamba atu iha oan, ka tamba relasaun seksuál.
Dezafiu sira ne’e lori ema tama iha konfuzaun iha nia konxiénsia: atu tuir loos ida ne’ebé: Tuir Kristu nia hanorin ka tuir moda ne’ebé mundu hatudu?
Ne’e mak rezumu loron horisehik nian, no ohin loron nakonu ida Kongresu nian ho tema “Família ho kualidade vida nian.
