Laga – 24 Jullu2022. Iha preparasaun ba festa tinan 150 Fundasaun Institutu nian, Inspetoria TIN deside atu fó mos tempu ba foin-sa’e sira – formande, joven, animadór no grupu kategoria husi parokia atu bele koñese no haklean Madre Mazzarello no irmán dahuluk sira-nian moris liu husi Kampu Mazzarello.
Nune’e iha loron 24 Jullu realiza kampu Madre Mazzarello ba foin-sa’e sira husi zona Baucau hamutuk na’in 224. Foin-sa’e sira ne’ebé partisipa iha kampu Mazzarello ne’e mak animadór/a oratorio no akóllitus husi Venilale, sentru Wailili, Kelikai, Laga no komunidade FMA Fuiloro. Aliende ne’e, partisipa mós reprezentante Aspirantadu Beatu Filipe Rinaldi Venilale, Pre-Aspirante no Aspirante FMA Venilale, Novisiu Salesianu Fatumaka no reprezentante ESTV Don Bosco Fatumaca.
Atividade hahu iha tuku 9 dader, ho dansa hino tinan 150 nian husi animador/a Laga hodi simu sira-nia maluk foin-sa’e sira husi komunidade seluk. Tuir mai, Ir. Olga Belo nu’udar konsiliera Provinsiál hato’o mós liafuan bem-vindo ba partisipante no agradese ba sira nia tempu hodi bele mai hamutuk realiza kampu Madre Mazzarello ida ne’e. Irmán mós husu ba foin-sa’e sira atu hamutuk ho irmán sira agradese Maromak ba tinan grasa nian tinan 150 fundasaun Institutu nian.
Molok partesipante sira ba kada grupu hahu ho orasaun . Tuir mai partisipante sira fahe ba grupu 7 bazeia ba fatin sira ne’ebé sira sei haklean. Fatin sira ne’e ; MAZZARELLI, VALPONASCA, PAROKIA, KOLÉJIU no NIZZA MONFERRATO. Tanba partisipante barak liu nune’e fatin Valponaska fahe ba rua no nune’e mós Koléjiu. Iha fatin sira ne’e, kada grupu hamutuk ho irmán ne’ebé gia haklean fatin moris Madre Mazzarello nian iha parte espirituál no no umana nian. Halo reflesaun pesoal ba pergunta sira ne’ebé husu iha fatin idaidak no fahe reflesaun ne’e iha grupu kiik ba maluk sira. Tuir mai kada grupu prepara rezumu badak konaba fatin ne’e, prepara YEL,YEL, drama no empeñu grupu nian hodi aprezenta iha asemblea nune’e maluk sira husi fatin/ grupu seluk bele hatene konaba fatin ne’e.
Foin-sa’e sira agradese tebes ba momentu furak ne’e, tan sira bele koñese Madre Mazzarello nia moris. Tanba durante ne’e hatene diak liu mak Don Bosco. Nune’e iha grupu barak mak empeña an atu moris tuir virtude MAÍN nian, badinas iha serbisu, orasaun, haraik-an, ksolok no obedese nafatin. Hafoin orafanatu sira aprezenta drama konaba vokasaun Ir. Henricheta Sorbone nian.
Ikus liu taka ho Eukaristia santa ne’ebé selebra husi Pe. Albino Fernandes SDB no Pe. Isaias Bonifacio SDB ko-selebrante. Iha omilia Padre Isaias komenta ba Leitura dahuluk no Evanjellu nian katak orasaun mak dialógo ho Maromak la to’o atu hato’o deit ita nia preukupasaun maibé orasaun mós presiza agradese Maromak ba grasa moris nian liuliu nu’udar maun-alin husu Ninia laran luak no mizerikórdia. Hafoin husu mós ba foin-sae sira atu sai fali Mazzarello iha oratorio no eskola ba maluk sira hotu liuliu moris tuir ninia atitude simples, haraik-an no preukupa ba ema seluk nia di’ak. Haka’as an atu sai mós Padre Pestarino ba maluk sira, tan dalabarak ita hakarak atu ema seluk sai Padre Pestarino ba ita maibé ita rasik lakohi sai Padre Pestarino ba maluk sira.
Atividade ida ne’e bele realiza tan kolabora no serbisu hamutuk husi irmán sira kada komunidade,liuliu Ir. Ligia no komunidade, irmán na’in 8 ne’ebé tulun hodi fó formasaun, ba maun salesianu sira. Liuliu agradese ba Pe. Isaias, Pe. Albino no Fr. Celso Babo ne’ebé prontu akompana foinsae sira no asisti. Agradese mós ba Pe. Andre Belo, diretór eskola Don Bosco Tomagua ne’ebé fó fatin atu bele realiza atividade ne’e.
