Fuiloro – Ekipa Pastoral Juvenil, zona Lospalos nian Ir. Angelita Gomes, FMA no Pe.Alarico, SDB organiza enkontru zonal ba animadores sira, parte Lospalos nian. Formasaun ida ne’e fo husi ir.Noemia no Pe. Alarico, tanba madre Angelita labele marka nia prezensa basa iha enkontru segunda idade ho tempu ne’ebé hanesan, nune’e irman Noemia mak sai nudar oradora hodi fo formasaun ba foinsa’e sira. Formasaun ne’e partisipa husi animadores sira, kuaze 200 pessoa, inklui mos postulante , irman, diakonu no padre sira. Formasaun ne’e hala’o iha loron 25 Marsu, iha oras tuku 05.00 otl to’o remata iha komunidade Madre Morano Larimaca Fuiloro, sentru sira ne’ebé partisipa iha formasaun ne’e, mai husi, parte Lospalos nian mak: Muapitine,soru, Home, Foema, Tcaiwaca no Sentru Lospalos rasik, husi Parte Fuiloro nian mak: Morano,Poros, somoco, Nanafoe, Sepelata, Motara, KB, Rasa no Sentru fuiloro rasik.
Topiko ba formasaun ne’e mak kona ba: Estreia 2017 Reitor Mor, esplika kona ba familia, ne’ebé haktuir katak familia iha ninia furak no nia limitasaun, iha familia mak mosu realidade umana konkretu iha ne’ebé ema aprende arte moris domin nian, ita simu naran dignidade nudar oan. Familia mos mak nudar eskola dahuluk, iha ne’ebé iha tau matan ba malu no akompanha malu. No husi dokumentu Amoris Laetitia nian, haree liu kona ba dezafiu familia nian, mak familia sira susar atu komunika ho oan sira, tanba preukupa demais ho serbisu, nune’e laiha tempu atu koalia, atu rona oan sira, no mos individualismo buka atu moris mesa-mesak lahanoin ema seluk.Aleinde ne’e iha mos valor familia nian mak: Generosidade, Perdua, sakrifisiu, soliedariedade. Iha parte ikus nian koalia kona ba “ Oratorio nu’udar Familia ida”, iha pontu jeral nian mak : animadores sira tenke sente oratorio mak familia nune’e senti duni hola parte ba familia oratorio, livre atu fahe esperiensia, senti uma, laran kmaus ba joven no labarik sira, no mos oratori sai fatin nostaljia ba labarik sira,labarik sira senti oratorio mak uma segundu. Nune’e mos animadores sira presiza iha laran manas, no fuan animador ida nian mak presiza: Respeita, hadomi, laran manas koalia kona ba Jesus, laran diak, laran luak, badinas, kreativu no perdua nain. Depois de Padre no Irman hato’o tiha sira nia formasaun, ikus nian iha mos perguntas ba sharing iha grupo, ne’ebé koalia kona ba animadores ida-idak nia esperiensia kona ba moris familia, no oinsa sira sente hola parte iha ambiente oratorio ka lae? no dezafiu ne’ebé hasoru iha oratorio, tuir mai hau hakarak fahe esperiensia animadores sira iha sharing grupu nian.
“Ami husi sentru oratorio Soru nian, buat ne’ebé ami esperiensia mak ami sente hola parte, tanba ami livre atu fahe ami nia esperiensia no kapasidade ne’ebé ami iha hodi tulun fali labarik sira ne’ebé mai iha oratorio, no ho labarik sira nia partisipasaun bele aumenta ami nia kapasidade no treinu ami nia mentalidade oinsa atu sai lider hodi koalia no fo katekese ba sira. Dezafiu ne’ebé ami hasoru iha ami nia sentru oratori mak, falta komunikasaun, remata formasaun ne’e
Tauk atu loke-an ba maluk sira seluk, laiha fatin ne’ebé mak sufisiente atu halimar, halo jogos no seluk tan. Husi esperiensia hotu ne’ebé animadores sira, em jeral sira sente hola parte tebes ba oratorio, tanba iha ne’ebá mak sir abele fahe sira nia esperiensia moris nian, ho labarik ,madre inan aman no sira nia belun foinsa’e sira, labarik sira sente nudar bin ou maun ne’ebé lalais atu hakbesik, halimar, konta istoria. Maioria sira nia dezafiu mak, labarik susar atu komprende tetun no fatin oratorio mak ladun favorese, katak laiha kampu, fatin diak ba katekese, labarik sira ne’ebé nakar liu. Ida ne’e mak animadores sira nian dezafiu ne’ebé sira hasoru iha oratorio, no sira nia proposta no esperiensia sira ne’e hato’o ona ba ekipa PJ, zona Lospalos nian.
Depoisde formasaun, ikus nian hasai foto hamutuk no taka ho merenda ne’ebe oferese husi komunidade Madre Morano.
(Maria Sarmento-Angelita Gomes)
