Manatuto – Formasaun ba Manorin Pré -Eskolar ne’ebé Programa husi INFORDEPE & HANDS ho nia objetivu atu mellora no hakle’an koñesimentu formadór no professores nian kona ba Prosesu Dezenvolvimentu Labarik Nian, hahú husi moris to’o tama ba eskola, iha nivel Pré – Eskolár. Ho ida ne’e, bele fasilita manorin sira, atu koñese didi’ak labarik ida-ida nia Dezenvolvimentu Fíziku (Labarik nia kreximentu, motora fina no motora grossa) no Psikolójiku (Kognitivu no Sosiál-Emosionál) no Dezenvolvimentu Lian. Nune’e bele tulun labarik sira iha prosesu aprendizajen.
Atividade Formasaun nian hahú husi dia 2-6 de Maio de 2022 iha Município Manatuto iha Pré – Escolar Muki – Vila. Ir Zelia Lemos halo parte ekipa formadór/a sira-nian no nia hala’o formasaun ne’e iha Manatuto.
Loron Primeiru kona ba Dezenvolvimento Labarik nian ho nia aspeto prinsipal 4 ne’ebé mensiona iha leten. Loron ba daruak nian Dezenvolvimento Psikomotora no Dezenvolvimentu Sosiál-Emosionál. Loron datoluk kona ba Dezenvolvimento Lian no no Knaar Família iha Labarik nia Dezenvolvimentu. Loron dahaat nian ko’alia kona-ba Prontidaun Ba Eskola no Valoriza Labarik ida – ida.
Formasaun ba Professores Pré -Eskola iha Município Manatuto remata 6 Maiu ho akontesemento importante 2: primeiro Iha oras tuku 8:30 iha revisaun ba Módulu 1-8 ne’ebé aprende tiha ona (Introdusaun ba Dezenvolvimentu Labarik, Dezenvolvimentu Kognitivu, Dezenvolvimentu Psikomotora, Dezenvolvimentu Sosiál-Emosionál, Dezenvolvimentu Lian, Kna’ar Família iha Labarik nia Dezenvolvimentu, Prontidaun ba Eskola, Valoriza Labarik ida-ida). Hafoin Tuku 9 hahu halo ezame ba Profesores hotu ne’ebé tuir ona Formasaun. Remata Ezame kontinua ho enseramentu ka taka Formasaun kona ba Dezenvolvimentu Labarik husi Diretor da Educação Município Manatuto nian hamutuk ho Representante husi INFORDEPE no Organisasaun HANDS ne’ebé kolabora hodi realiza ona Formasaun ne’e. Ho taka ida ne’e sinal ba teritoriu tomak Timor nian kona ba Dezenvolvimentu Labarik. Iha biban ne’e Aproveita mos aprezenta no fahe Manual kona ba materiál hotu ne’ebé sei simu iha lorokraik oras tuku 14h.
Iha Enseramentu ne’e Senhor Diretor Educação Município Manatuto nian hato’o mos lia menon ba professores formandes hotu atu bele aplika didiak Konteudu hotu nb simu no aprende. Ba Formador nain rua Senhora Aurora no Ir. Zelia: agradese wain tebes tamba fahe ona Konteudu ne’ebé riku tebes ba Profesores Pré-Escola sira. Ami hein atu formasaun sira hanesan ne’e bele kontinua nafatin liu-liu ba Profesores Pré Escolar no Ensino Básico sira.
Agradese wain mos ba INFORDEPE NO HANDS ne’ebé organiza no realiza ona Formasaun ne’e ho Susesu, ba teritoriu Timor tomak.
(Prof. Aurora A. S. Quintão e Ir. Zelia Matos Lemos, FMA)
