Lautem (TL) – Iha 12 Outubru, hala’o Formasaun ba Estudante Ensinu Sekundária Jerál no 1 Lautem ne’ebé partisipante sira hamutuk estudante na’in 80. Formasaun ne’e diriji diretamente husi Director Nacional Prevensaun Komunitária Sr. Antonio Viegas ho ekipa tomak DNPKK – MI, partisipa mós husi Administrador Postu Lautem, Director da Eskola Ensino Secundaria, Polisi Eskuadra Postu Lautem no mós mestre sira ne;ebe akompaña estudante sira ba seminar ne’e. Seminar ne’e nia objetivu mak fó koñesimentu ba estudante Sekundária sira kona-ba oinsá harii/ kria Dame iha Sosiedade Laran no hadook an husi konflitu no violénsia ne’ebé ohin loron afeita makaas foin-sa’e sira. Iha tempu hanesan Irma Ines Freitas Bartolo, FMA lori mós tema ida kona-ba Étika Morál & Sosiál (Reflesaun espirituál) liga ho Edukasaun & Evanjelizasaun Foin-sa’e sira ohin loron.
Tuir reflesaun ne’ebé prepara ba seminar ne’e mak foti husi Papa Francisco nia karta Ezortasaun Apostólika Pós-Sinodál “Christus Vivit”
Karta ida ne’ebé Amu-Papa haruka ba foin-sa’e sira kona-ba: “ Foin-sa’e sira nia moris iha tempu ohin loron no tempu futuru. Husu foin-sa’e sira atu sai husi sira nia fatin hodi ba buka atu atria foin-sa’e sira hodi esperiénsia kona-ba Nai (Foin-sa’e sira sai Apóstolu ba malu).
Esplika mós kona oinsá problema barak ne’ebé foin-sa’e sira hasoru iha moris. Foin-sa’e barak mak la konxiente ona kona-ba saida mak sala ou pekadu. Laiha ona respeita ba isin nu’udar Maromak Nia horik fatin. Soe bebé/ abortu kuaze bebeik mosu. Sidade Dili mak sai sentru foin-sa’e sira nia hasoru malu. Foin-sa’e barak asesu ba Internet maibé lahatene uza didi’ak, tan ne’e bele lakon moral no respeita ba an rasik. Ne’e hotu sai problema eh dezafiu ba foin-sa’e sira ohin loron. Ikus liu atu fó korajen ba foin-sa’e sira mak kaer fali Aman Don Bosco nia lia fuan ne’ebé dehan: “Laiha foin-sa’e ne’ebé mak aat, iha mak foin-sa’e ne’ebé mak seidauk hatene oinsá atu sai di’ak no ema ruma tenke tulun sira”.
(Comsoc Fuiloro)
