Venilale – Ohin loron 3 Dezembru 2021, ami, edukadóra/Irmán sira no labarik sira iha orfanatu Venilale haksolok tebes tanba hetan oportunidade furak hodi partisipa formasaun kona direitu labarik sira-nian husi Komisáriu Nasionál Direitu Labarik nian. Iha tópiku 2 mak ko’alia iha enkontru ne’e: Konvensaun direitu ba labarik (KDL) no Violénsia bazeia ba jenéru (VBJ) no lei kontra violénsia domestika.
Iha parte dahuluk asuntu sira ne’ebé ko’alia mak:
Definisaun: Artigu Konstituisaun RDTL ne’ebe sita kona ba direitu labarik mak: 9,18 no 54.
Labarik sira nia direitu iha 4: direitu atu moris, direitu ba dezenvolvimentu, direitu protesaun no direitu partisipasaun.
Iha parte daruak asuntu sira ne’ebé ko’alia mak tuir mai ne’e:
1.Saida mak violénsia bazeia ba jenéru.
2.Tipu sira husi violénsia bazeia ba jenéru iha 4: violénsia fízika, violénsia seksuál, violénsia psikolójika no violénsia ekonómika
3.Impaktu husi violénsia bazeia ba jenéru iha pontu importante 5: vítima, labarik, suspeitu, família no komunidade.
4.Oinsá tulun vitima violénsia bazeia ba jenéru? Iha parseiru sira ne’ebe fornese servisu iha rede referál: polísia (VPU), Alfela Fokupers, psycho-social PRADET, casa vida, Holy Spirit sisters, Fundasaun Alola,Uma-mahun no Ospitál fatin hakmatek nian.
Nudar komunidade ami Irmán, formande no labarik sira agradese ba ekipa komisária nasionál ne’ebé ho sira nia disponibilidade mai fahe informasaun ida-ne’e mai ami.
(Orfanatu S. Domingos Savio-Venilale)
