Dili – Liu tiha prosesu aprendijazem tinan ida nian, dia 19 de Novembro 2016 Pre-escolar Maria Auxiliadora Grupo C no B halo sira nia graduasaun nu’udar Doutor ABC. Ami hanaran Doutor A, B, C tanba durante tinan rua ba estudante sira tinan 4 no estudante sira tinan 5 ba tinan ida, ne’ebé durante tinan ida-ne’e sira konsege lee alfabeto husi A-Z no sura numeru 1-10, tau kor ba dezeñu, kanta, halimar hodi aprende ou a prende liu husi halimar no aktvidades seluk tan tuir kurríkulum ne’ebé trasa ona husi Ministériu da Edukasaun parte Pre-escolar nian.
Nune’e seremonia dadersan solene tebes, estudante nain 73 ne’e ho sira nia toga ne’ebé simples, hanesan Doutor lolos maibé ho tempu hanesan halimar kontinua. Di’ak nune’e seremonia hahú ho Marcha entrada ho múzika graduado/a sira nian, tuir mai sira hananu hamutuk Hino Nacional, Orasaun husi graduada ida, lia-menon husi parte oioin; diretora da eskola, representante husi Ministerio da Edukasaun Senhor Miguel, husi Madre Provincial FMA, momentu simu Certificado, liafuan agradesimentu husi estudante sira hafoin tuir konviviu katak; dansa, puizia, hananu no remata hasai foto hamutuk no koa Kek hafoin han hamutuk.
Durante diskuru husi parte edukasaun nian Senhor Miguel louva Pre-eskolar Maria Auxiliadora tanba durante seremonia estudante sira bele lee testu naruk, laos de’it kuñese Alfabeto A,B, C.. maibé estudante kuaze hotu hatene lee neneik ona, ne’e katak professora sira akompaña didi’ak labarik sira. Obrigada no Parabens ba professor sira. Husi parte seluk Madre Provincial ninia lia menon ba estudante sira madre uza Jesu ninia istória kona-ba ema riku boot ida-ne’ebé atu la’o ba rai dook, molok nia atu ba nia bolu ninia empregadu sira hotu hodi fo osan mean ida-idak ba sira, hodi husu ba sira atu uza didi’ak osan mean ida-ne’e to’o nia fila. Wainhira riku ne’e fila -fali nia bolu fali empregadu ida-idak hodi husu konta se sira uza didi’ak duni ka la’e? ida uluk mai dehan ha’u uza didi’ak hodi heten fali 10 nia dehan di’ak o sei ukun sidade 10, sira seluk mós hanesan tutuir malu, nune’e Madre Provincial rezumu istória badak ne’e hodi dehan ba estudante sira, imi mós hanesan imi ida-idak simu osan mean kiik ida, osan mean, ne’e mak imi nia talentu no matenek sira, ohin imi halo festa tanba imi konsege uza didi’ak imi nia osan mean ne’e, liutiha tinan 10 imi sei konvida ha’u atu mai fali hodi selebra osan mean sanulu tan katak imi sai ona ema boot, no matenek. Parabens ba imi hotu.
Nune’e seremonia graduasaun ba doutor A,B, C sai tiha nu’udar festa familia nian, tanba tinan ida-ne’e primeira vez Inan aman husi estudante sira, halo planu hodi realiza festa graduasaun hamutuk ho eskola. Tebes duni sai momentu furak wainhira konsege servisu hamutuk ho leigu sira, husi kedas protokol, mestre seremonia, simu bainaka, no ikus nian realiza konfraternizasaun han hamutuk ne’ebé inan aman estudante sira nia mak responsavel direitamente. Festa sai furak liu tanba ema hotu envolve. Nune’e espiritu familia Salesiana sai buras liutan iha Eskola Maria Auxiliadora.
(Ir Olga Belo, FMA)
