Fuiloro – Loron 9 Dezembru, iha komunidade Madre Morano Fuiloro, hala’o eventu importante ida, “Graduasaun ba menina kursu husi área “Secretariado e costura”, graduante sira ba tinan ida ne’e hamutuk 52, 50 kompostu husi área computador nian no nain 2 husi área costura nian. Partisipante ba serimónia ida ne’e husi membru Governu, Madre, Padre, família no menina/u koléjiu.
Serimónia gradusaun ida ne’e halao iha Gym Don Bosco Fuiloro, hahu loke ho selebrasaun Eukaristia, selebrasaun Eukaristia ida ne’e selebra husi Padre na’in 4, Padre Tranfiguração mak nu’udar selebrante, nune’e iha ninia omilia, nia foka liu ba leitura sira ne’ebé ko’alia kona ba “Agradese nafatin”. S. Paulo nia agradesementu ne’ebé permanente, depedénsia totál iha Maromak tan nia ema aat, maibé Maromak bolu nia, atu sai Maromak Nia manu-ain, hanesan mós iha Bíblia, Salmo 100 relata katak, agradesimentu liuliu ba Maromak, tan nia domin no laran di’ak. Agradese ba Maromak katak hahí no adora, rekoñese Maromak nia ezisténsia.
Nune’e, molok nia remata ninia omilia nia apresia ba menina graduada tinan ida ne’e ba sira nia badinas no fó-an atu aprende hotu ne’ebé madre no formadór/a sira oferese no konsege too rohan.
Wainhira remata tiha selebrasaun Eukaristia, kontinua kedas ho serimónia graduasaun nian. hodi tara tais ba diretor/a sira ne’ebé prezente iha momentu ne’ebá, hafoin entrega sertifikadu. Depois de entrega sertifikadu kontinua kedas ho diskursu sira, uluknanain husi Madre Diretora komunidade Sebastiana Soares. Madre Alma Castagna, provinsiál, hato’o mensajen furak loos ba graduada sira ho pontu importante tolu: primeiru Estudu: madre dehan ba menina graduada sira, atu haboot sira nia koñesementu husi formasaun no esperiénsia hotu ne’ebé sira hasoru, no koñesimentu ida ne’e la’ós ba imi nia-an de’it maibé kontribui ba família no mós ba nasaun. Ba daruak nian mak kona ba serbisu: ba membru governu sira ne’ebé prezente liu-liu Secretário de estado Juventude e Trabalho no membru governu seluk katak, nia dezeju mak sira nia preparasaun ida ne’e tulun boot ba nasaun, nune’e hein katak estadu bele fó fatin ba sira atu haboot liután sira nia esperiénsia iha kampu de traballu. No pontu ikus liu mak orasaun: iha-ne’e nia foka liu ba inan no Aman sira, katak fó tempu ba oan sira atu deside ba sira nia moris rasik, inan-aman nia knaar mak akompaña oan sira ho orasaun, reza atu sira bele sai prezensa Maromak nia iha mundu ne’e.
Mensajen seluk husi Secretário Estadu Juventude e Trabalho Senhor Nívio Leite Magalhaes: “ husi ninia parte nia haksolok, atu partisipa serimónia ida ne’e maske tenke mai husi dook, nia apresia graduada sira hodi fó parabéns ba tan sira konsege remata kursu ida ne’e. No nia hatutan tan katak SEJT sei fó prioridade ba ba formasaun profisionál no vokasionál, nafatin fó apoiu ba sentru CFSC Fuiloro ba tinan mai. Sentru ida ne’e nafatin produs ema ho kualidade ne’ebé diak la’ós umanamente de’it maibé mos moralmente no espiritualmente. SEJT sei serbisu hamutuk ho kreda, liu-liu ho Salezianu/a sira tanba ida-ne’e mak kongregasaun ida besik liu ba juventude sira.
Depois de remata tiha diskursu sira, iha hasai foto hamutuk. No ikus liu almosu hamutuk iha komunidade Madre Morano Larimaca. Depoizde almosu Secretário Estadu Juventude e Trabalho ho nia komitiva sira vizita sentru formasaun, hodi tama iha aula komputadór nian hodi haree materiál sira ba formasaun. Remata tiha serimónia ida ne’e konvidadu no Família sira ida-idak fila fali ba sira nia fatin, hodi simu mós grasa boot ne’ebé Maromak haraik, udan-been nune’e bele halo malirin oituan kondisaun ne’ebé manas sira sente. (Maria Sarmento Guterres)
