Dili – Irmán FMA ho knaar diretora komunidade sira hamutuk ho konsellu inspetoriál, ohin, 8 Jullu, halo enkontru formasaun nian ho tema “Contemplate” (kontempla bá). “Contemplate” mak Surat datoluk Kongregasaun ba Institutu sira Vida Konsagrada no Sosiedade Vida Apostólika nian hasai – ho data 15 Outubru 2015, memória litúrjika santa Teresa d’Ávila, doutora Kreda nian —depoizde testu sira “Rallegratevi” no “Scrutate” iha tempu folin liu Tinan Vida Konsagrada nian.
Dokumentu ida-ne’e fanun fali relijiozu/a sira atu hakle’an sira-nia identidade no foti inspirasaun husi livru “Cântico dos Cânticos” ho liafuan xave tolu: “cercare” (buka), “dimorare” (horik), “formare” (forma). “Ema relijioza/u sira simu bolun atu sai profeta, místika/u no kontemplativa/u sira, deskobre sinál sira Maromak nia prezensa nian iha moris loroloron, sai interlokutór sapiente ne’ebé hatene rekoñese lia-husu sira ne’ebé Maromak no umanidade halo iha ita-nia istória nia lalaok sira”.
“Ita-nia babukak Maromak nian simu bolun ba haraik-an basá ita rekoñese iha an rasik nu’udar ema ‘ateu potensiál sira’, koko difikuldade fiar nian”. “Buka Maromak – surat ne’e dehan – husu atu atraversa kalan no mós horik iha kalan ba tempu naruk. Atu deskobre forsa no beleza dalan ida fiar nian ne’ebé hatene para iha nakukun dúvida nia oin, hodi la iha pretensaun atu tenke oferese solusaun…”.
Surat ne’e mós fó hanoin katak horik iha konversaun mak atitude kontemplativa ida, basá lahó konversaun la iha domin. Axeze tanba dalan perfeisaun nian no beleza nian mak dalan kloot ida. Nune’e mós aspetu determinante orasaun nian: orasaun mak pulmaun no labele husik nia. Kontemplasaun iha vida sarani no iha vida konsagrada mak intelijénsia, fuan, ain-tuur. Orasaun lori ba sentru an rasik nian, entrega ita ba Jezús no kura ita-nia fuan.
«Forma»: «empeñu ida husu ba ida-idak no ba komunidade sira atu tama iha mistériu no tama iha Oin furak liu entre ema nia oan sira, no aprende rekoñese nia iha maun-alin sira nia oin ne’ebé desfiguradu». Presiza forma an ba orasaun, atu tulun moris iha dimensaun kontemplativa vida konsagrada nian.
Irmán sira fahe tiha ba grupu rua atu reflete no partilla kona-ba “oinsá bele moris kontemplativa iha realidade ita-nia moris ativa no nu’udar saleziana, esperiénsia saida mak tulun”; pergunta daruak mak “entre liafuan tolu ne’e, liafuan ida-ne’ebé mak ita moris tuir ona iha komunidade no ida-ne’ebé mak presiza habiit liután nu’udar FMA”.
Liuhusi diskusaun iha grupu Irmán sira rekoñese katak esperiénsia saleziana riku tebes ho elementu kontemplativu sria haree iha Don Bosco no Madre Mazzarello nia moris. Don Bosco rasik husu FMA sira atu moris nu’udar “anju no tempu hanesan nu’udar apóstolu sira”, “nu’udar Marta no nu’udar Maria”. Haree fali ba dokumentu “Contemplate” Irmán sira deskobre katak elementu tolu “buka, horik, forma” ne’e liga malu. Presiza atitude hamrook liután ba Maromak hodi horik nafatin iha Maromak nia domin. No ida-ne’e husu dixiplina axeze nian.
(Lanny Ganda)
