Dili, 03 Outubru 2020. Hodi taka fulan jubileo rai nian no hatan ba Amu-Papa nia konvite atu tau matan ba uma komun, no mos iha tempu hanesan selebra festa São Fransisco Assis nian, padrueiru ba ekolojia nian, ami komunidade desidi hamutuk ho menina sira atu halo asaun ruma hodi hatudu ami nia domin ba naturesa. Tan ne’e hahalok ki’ik ne’ebé komunidade hamutuk ho menina sira halo iha fulan ne’e nia laran mak : Tau matan ba ambiente uma nian, la soe for arbiru, la estraga bee no selu-seluk tan, no ikus liu atu taka fulan ida ne’e nian ami hotu sai ba liur atu kuda ai horis ne’ebe ami prepara ona iha fulan ida nia laran. Fatin ne’ebé ami identífika atu kuda ai horis ne’e mak gruta Ave Maria – Comoro nian.
Objetivu ba atividade ida ne’e nian mak atu haburas liutan sira nia domin ba natureza, no ikus sira ida-idak espresa sira nia sentimentu hodi dehan :
- Ha’u hakarak kuda ai-horis ne’e tamba ha’u mos hakarak kolabora ho Maromak atu fó mahon ba rai. (Auxiliadora)
- Ha’u kuda ai-horis tamba ha’u hakarak atu fatin ne’e sai fresku nafatin nune’e ema hotu ne’ebé mai visita fatin ne’e bele mos hahi Maromak ba hotu ne’ebé Maromak kria. (Nivia Suzana)
- Ha’u mos hakarak kuda ai-horis ne’e tamba atu preteje no halo rai labele monu.
- Ha’u kuda ai-horis tamba ha’u hadomi natureza no ha’u hakarak atu ema hotu bele sente nia furak. (Zelia de Carvalho)
- Ha’u kuda ai-horis tamba ha’u hakarak haburas no tau matan ba ha’u nia rai. (Juvelina Amaral)
Depois de kuda ai horis, ami merenda hamutuk no ikus taka ho Tersu ne’ebé prepara husi Ir. Martha ne’ebé tulun ami no lori mos ami atu kontempla naturesa nia furak. Obrigada barak.
(Domingas Pereira FMA)
