Dili – Hahú husi loron 17-21 Jullu 2021, hamutuk ho Me. Alma ne’ebé akompaña, ami, Irmán sira segundu novisiadu nian, hakle’an liután votu kastidade nia valór no sentidu sira iha vida konsagrada FMA.
Ita-nia moris kastidade hetan ninia xave iha Maromak nia liafuan ne’ebé haktuir liu husi profeta Oseias: “ha’u sei halo ó ha’u nia kaben ba nafatin, iha justisa no iha direitu, iha laran di’ak no iha domin” (Os 2,21).
Ho pasajen ida ne’e Maromak hakarak identifika nia domin ba ema nu’udar Ninia kaben, halo ita sai konxiente liutan konaba Nia domin ne’ebé boot ba ita hodi hili ita sai Ninian ba nafatin, ho konviksaun hotu ne’ebé presiza atu moris ho fiél no persevera nafatin iha moris tomak.
Ita-nia misaun la’o hamutuk ho ita nia kastidade. Tuir Don Bosco, “ita tenke hatudu ita nia kastidade nu’udar karakterístika espesiál”. Don Bosco hateten nune’e la’ós tanba nia gosta liu kastidade ka hakarak fó valór boot liu ba nia duké ba konsellu evanjéliku seluk. Nune’e mós Madre Mazzarello dehan: “ita ne’ebé iha misaun ho menina sira, ita mós presiza uza hanesan Don Bosco, maibé Don Bosco mak santu ida, ita seidauk. Ita uza ita nia fuan liufali ita-nia ulun no ita nia fuan sensivel, fraku no belit malu lalais, ita presiza banati tuir Don Bosco iha ninia domin moos, santu no kastu”. Madre Mazzarello hatudu ninia talentu nu’udar edukadora no maternidade hodi hadomi labarik no foin-sa’e sira ho fuan tomak no ho Maromak nia domin.
Iha ita nia misaun hasoru foin-sa’e no labarik sira, kastidade sai hanesan ita nia karakterístika espesiál iha ita-nia moris, nune’e ita presiza tau atensaun nafatin iha ita-nia relasaun ho ita nia destinatáriu sira ho domin ne’ebé moos no loos.
(Irmán Perpetuande sira)
