Venilale – Selebra loron S. Maria Domenica Mazzarello iha tinan ida-ne’e espesiál liu basá komunidade edukativa deside atu halo esperiénsia “marian camp” (Maria Nazaré no Maria Mornese) ba estudante, inan-aman no profesór/a sira. ADMA no antiga aluna sira balun mós partisipa iha atividade ne’e. Ba ADMA oportunidade di’ak tanba iha loron tuirmai, katak 13 Maiu, sira hafoun sira nia kompromisu no simu membru foun iha Fatumaka. Marian camp ne’e hala’o husi loron 12-13 Maiu.
Atividade hahú ho orasaun abertura no aprezentasaun ho powerpoint kona-ba fatin sira Na’i-Feto no Madre Mazzarello nian. Partisipante sira fahe ba grupu lima tuir fatin sira ne’ebé hanesan Nazaré no Borgo Alto; Ain Karem no Valgelatta; Ejitu no Valponasca; Caná no Laboratóriu suku; Jerusalém no Collegio.
Irmán, profesór/a no alunu balun anima grupu sira, seluk fali sai partisipante. Iha grupu ida-idak partisipante sira reflete kona-ba Na’i-Feto nia moris bazeia ba Testamentu Foun no halo paraleizmu ho Madre Mazzarello nia moris iha etapa sira haktuir ona iha leten. Grupu hotu liu husi etapa hotu no hafoin sira halo sira-nia kompromisu atu moris tuir Maria Nazaré no Maria Mornese nia moris nu’udar inan-aman , nu’udar joven, nu’udar edukadór/a. Kalan 12 Maiu nian taka ho orasaun ho ahi-klobor eh Campfire.
Loron 13 Maiu mak loron ba selebrasaun eukarístika, ne’ebé selebra husi Pe. Abraão ne’ebé iha ninia omilia konvida asembleia atu agradese Maromak ba Maria Mazzarello nia santidade. Nia sita Madre Mazzarello nia liafuan atu hatais an ho Kristu, katak moris iha haraik-an no iha karidade, hanesan Madre Mazzarello sempre halo.
Simu tiha oan sira nia kaderneta no haree oan sira nia aprezentasaun, inan-aman no komunidade tomak halo almosu no taka ho haree espozisaun.
