Baucau- Festa Epifania ne’ebé tinan ne’e monu iha loron 3 Janeiru, mak sai nu’udar loron Infánsia Misionária nian. Nune’e Infánsia Misionária husi parókia Vila-Nova no Katedrál festeja hamutuk festa ida ne’e iha parókia Vila Nova. Atividade ne’ebé hala’o mak misa hamutuk hodi envolve OPIAM sira mak sai responsável ba litúrjia. Iha omilia Pe. José nu’udar diretór Misio dioseze Baucau nian hateten katak ita tenke fó importansia ba labarik sira tanbá sira mak sai nu’udar esperansa uma kreda no nasaun nian. Nia aproveita mós hodi hafanu inan-aman sira atu envolve sira nia oan sira iha atividades kreda nian. Ba labarik sira nia hameno atu sai laran manas liután hodi lori ba oin ho sira nia kompromisu katak (labarik tulun labarik ho espíritu orasaun, esmola, sakrifisiu no sasin),
Depoizde misa iha mós asaun karitativa hodi ba vizita ema moras sira iha ospitál referál Baucau Pe. Pároku katedrál no diretór Misio dioseze Baucau Pe. José mak akompaña labarik sira. ema moras kontente ho labarik sira nia prezensa liu-liu orasaun ne’ebé labarik sira oferese ba sira.
Labarik grupu ida hamutuk ho Ir. Albina ba sentru Caisido hodi misa hamutuk ho povu sira hodi fahe paun ba labarik, ferik no katuas sira. Sarani sira kontente hodi apresia labarik sira nia prezensa iha sira leet nu’udar fitun kiik ida nabilan hodi lori ksolok ba sira.
Halo tiha asaun karitativa labarik sira fila-fali hodi han no halo atraksi hodi haksolok hamutuk iha loron ida ne’e. Ambiente nakonu ho ksolok labarik sira ho espontaña espresa sira nia ksolok liu husi dansa, canta, poezia no drama hodi hatoo ba malu ksolok natal no tinan fóun nian maski liu ona.
Depoizde konviviu Padre, ‘animadores’ no konsellu parókia balun halo enkontru atu haree hamutuk preparasaun ba aniversáriu ordenasaun espiskopál Amu-Bispu nian ne’ebé sei realiza iha dia 6 mai. Tanba husi Vigáriu pastorál dioseze nian entrega festa ne’e ba OPIAM sira mak atu organiza.
Atividade loron ida ne’e la’o di’ak no labarik sira mós partisipa ho entuziasmu hodi hatudu duni sira nia laran manas Misionaria nian.
(Albina do Carmo)
