Viqueque – Amu-Papa Francisco husu, liu-liu iha tinan Jubileu Mizerikórdia nian ne’e, ita tenke tau matan maka’as liután iha Na’i nia Mizerikórdia, atu ita bele sai ‘sinal ne’ebé hatudu klaru liu Aman Maromak nia hahalok sira. Nune’e komunidade organiza hodi halo peregrinasaun hamutuk ho komunidade edukativa iha loron 19-08-2016 iha Viqueque.
Objetivu ba peregrinasaun ne’e mak atu manán ‘indulgênsia’ iha tinan santu ida ne’e, hodi deskobre loron ba loron Maromak Nia Mizerikordia iha ita ida-idak nia moris. Dalan ida ne’ebé halo Maromak ho ema hasoru malu, tan loke ita nia fuan ba esperansa, katak biar ema sala nain Maromak hadomi nafatin ema ida-idak. Peregrinasaun hanesan imajen ka modelu ne’ebé ema ida-idak hala’o iha nia moris. Ita nia vida iha mundo hanesan ema lao rai ne’ebé buka ba hasoru fatin ka objetivu ne’ebé Maromak hadia ona. Peregrinasaun ne’e ita halo hodi hanoin katak ita ema nia vida iha rai ne’e la’ós atu hela ba bebeik, maibe fatin atu moris hodi liu ba fatin seluk.
Preparasaun ba peregrinasaun ida ne’e, hahú ho selebrasaun penitensiál durante loron rua nia laran ba ‘alunos, professores, colaboradores, trabalhadores no madres’, tanba ami fiar katak Maromak Nia indulgênsia la’ós deit perdua sala sira, maibé kasu ka hamós sala nia marka iha ita nia moris, no fó biban ba ita atu haboot ita nia domin no karidade iha ita nia moris. Peregrinantes sira ne’e sente haksolok tebes, tanba husi parte ida espirituál nian, sira sente katak Maromak iha nia laran-luak sei perdua sala sira liuhusi peregrinasaun ne’e. Nune’e iha orasaun, sira ho entuziasmu tebes atu hasa’e sira nia-an tomak ba Maromak.
Iha parte seluk, komunidade Viqueque simu sira ho ksolok tebes. Komunidade ne’e nia odamatan nakloke duni atu simu peregrinante sira husi fatin oioin. Ami agradece ba komunidade Viqueque ne’ebé oferese mai ami sira nia fatin santu, atu ami bele reza no kanta. Hahalok ida ne’e nudar sinál partikulár ida atu sente Aman Maromak Nia Mizerikórdia.
(Yashinta Hoar)
