Iha loron Sabado, 23/01/2021, ami Novicia sira remata ami nia retiru ne’ebe realiza ona, durante semana ida nia laran (16-23/01). Durante retiru nia laran ami hetan tulun gia husi Pe. Trans SDB, nu’udar Pregador hamutuk ho Me. Alma ne’ebe akompana ami ba semana tomak.
Retiru sai momentu furak mai ami atu reflete klean, Maromak nia domin ne’ebe ami ida-idak simu, partikularmente prezente vokasaun nian, bolun uniku atu tuir Nia iha kongregasaun Saleziana.
Agradese husi fuan ba Madre Provincial, Me. Alma Castagna, ba liafuan murak ne’ebe ami simu iha Boanoite sira, ne’ebe koalia kona ba Obra Kriasaun nian. Loos duni loron sira ne’ebe Maromak uza hodi kria Lalehan no rai ho buat to’o iha Nia kriasaun ne’ebe aas no folin liu mak ita ema. Maromak kria hotu iha ordem nia laran, tan di’ak iha Nia matan no tanba domin de’it.
Hanesan MM nia santidade, la halo buat ruma ne’ebe bo’ot, maibe oinsa nia servi foinsa’e sira ho ekstrordinario fo an tomak no fo “buat ne’ebe diak liu.”
Ba Padre Trans ne’ebe tulun ami oinsa atu sai religiosa ne’ebe diak ho abut metin. Tebes…. Dalan ne’ebe ami tuir la remata ho ami nia resposta ba dala ida deit, maibe loron-loron hatan ho ksolok ho liberdade fuan nian, hanesan laiha tan buat seluk ne’ebe ami tenke hanoin se lae atu tuir deit Nia. Liu-liu ba rikusoin moris religioza iha komunidade, ne’ebe hafurak no hariku liutan ita nia saran-an ba Na’i.
Ami agradese mos ba Madre Lanny no Me. Isaura ho sira nia ekipa hotu, ne’ebe suporta ona ami iha parte material no haforsa ami ho aihan midar sira, ami agradese. La haluha agradese mos ba Kom. Sao Jose, ba Me. Esmeralda no Irman sira hotu iha komunidade nia suporta no orasaun.
Obrigada barak.
Irmán Novisa FMA
