Festa agradesimentu Komunidade Laura Vicuña 2020
LAGA- Tinan ida ne’e komunidade hili loron 25 Jullu atu selebra loron Agradesimentu, la hanesan ho tinan-tinan ne’ebe hili atu selebra fulan ikus tinan nian. Maibé tinan ida ne’e ami iha motivu atu agradese ba malu la’ós iha fulan ikus tinan nian maibé iha fulan klaran tinan nian hodi halo agradesimentu sai eko kontinua iha ami nia moris hamutuk nian.
Tema ne’ebe hili mak “Hamutuk ho Maria ita agradese ba malu ba grasa ne’ebe simu”. Razaun hili tema ho Maria atu agradese uluk nanain ba ninia protesaun durante Pandemia Corona Virus-Covid19 ne’ebe kontinua husu konvokasaun ba ninia protesaun no grasa ne’e ami simu duni no mos ba Timor tomak. Iha tinan ida ne’e ami fó prioridade ba orasaun no sakramentu sira. Nune’e ami hahu ho orasaun ba klasse ida-idak, ba SDB sira, ba kolaboradores leigus sira no ba FMA sira. Iha loron 3 ikus nian iha preparasaun penitensial atu orfaun sira hakbesik an ba konfesaun, Rosario moris nian no santa Missa. Iha omilia ba loron agradesimentu nian Pe. Julio Mota,SDB dehan atu fó agradese la’ós atu halo lamentasaun kontinua maibé atu simu buat hotu ho ksolok, atu agradese ba 
moris sira ne’ebe simples la’ós foti an no soberba. Agradesimentu ne’ebe loos mak ida ne’ebe suli husi fuan ho ksolok no sinseridade. Mensajen ne’e tulun ami atu bele kontinua inspira iha moris loroloron nian.
Komunidade selebra deit misa iha loron 25 de Julho no programa festa nian sei hala’o iha dia 26 de Julho tanba kolaboradora/kondutora komunidade Mana Lita nia subriña Natalia Arcanjo Brito mate no iha loron hanesan sei hala’o ninia misaa fúnebre nian no komunidade tomak ba partesipa misa iha Parokia. Maski tenke adapta an ba situasaun, komunidade simu ho ksolok ba mudansa orario sira hodi halo karidade uluk nanain ba familia enlutada. Atu selebra didi’ak festa ida ne’e komisaun organizadora prepara ema ida-idak nian hodi dada nune’e iha kalan depoizde dansa no kanta sira sei fo presente ki’ik ida ba sira ne’ebe ita dada no ba sira ne’ebe reza ba. Maski prezente simples no kiak maibé nakonu ho domin no admirasaun.
Festa taka ho fahe presente sira ne’ebe komunidade simu nu’udar providensia no ema hotu haksolok tebes no agradese ba malu iha klima ksolok salesiana no familiaridade nian tuir espiritu Valdoco no Mornese nian.
(Angel)
