Festa Agradesimentu Komunidade S. Jose’
Dili, 02.06.2022, Iha loron ida ne’e mak oportunidade diak ba ami atu hanoin fali Maromak nia diak ne’ebé halo ona mai ami durante tinan ida iha ami nia moris nu’udar komunidade. Hodi foti tema: “Hamutuk ita agradese ba domin nu’udar bin alin”, ne’ebé lori ami atu deskobre buat diak wain husi ema ida-idak ne’ebé durante ne’efahe ba malu tamba domin. Ami hahu husi loron 6 (ne’en) antes hodi agradese no reza ba: Trabalhadores, oratoriano sira, Novicia sira, Salesiano sira, Irmán Juniores sira, Irmán Perpetua sira no ikus taka ho reza ba Madre diretora, Me. Evangelina Xavier, FMA. Loron 1 Juñu loraik ami reza Tersu espesial ho intensaun agradesimentu nian, loron tuir mai mak loron festa nian. hahu ho orasaun dader ne’ebé nakonu ho gratidaun no Misa iha loraik hodi kontinua ho jantar de konfraternizasaun no atraksi sira.
Iha Misa ne’ebé preside husi Pe. Matias, SDB. Iha homilia Padre dehan: “Ohin imi selebra festa agradesimentu komunidade nian, moris komunidade nian iha relijiozu/a sira nia moris mak hatudu iha sira nia moris no servisu hamutuk. Relijiozu/a ida nia la hado’ok-an husi Komunidade. Iha komunidade ne’ebé iha nia membru oi-oin; iha senior no junior katak bin ho alin. Laos bin alin iha ligasaun ran nian maibe iha ligasaun domin Maromak nian. ita iha komunidade hanesan bin ho alin eh maun ho alin hodi lao hamutuk ho domin Maromak nian. maromak bolu ita no tau hamutuk ita iha komunidade ida. Ita mai husi fatin oi-oin Maromak tau hamutuk ita nu’udar komunidade,nu’udar bin alin. Tamba ne’e mak imi dehan “hamutuk ita agradese tamba domin, domin Maromak ninian”. Tamba ne’e relijiozu/a ida nia tenke hadomi, tamba ita moris iha komunidade ho Maromak nia domin. Domin ne’e mos tenke iha sakrifisiu. Komunidade relijiozu Kristu mak tenke sai ulun no sentru mai ita no ida ne’ebé sai nu’udar diretor/a hili atu lidera no gia atu komunidade ida lao tuir nia karizma no fundador/a sira nia hakarak. Iha komunidade ida atu bele moris iha Maromak nia domin, membru sira tenke iha kolaborasaun, servisu hamutuk ho diretor/a. Se ida-idak lao keta-ketak ne’e laos komunidade maibe keta-ketak. Kristu mak sai sentru maibe mos iha ida mak lidera, ida ne’ebé sai mos bin, sai mos maun atu lidera nune’e ita bele lao tuir lolos Kristu. Tamba ne’e mak nu’udar relijiozu/a ita servisu ba Maromak nia reino, servisu ba gloria Maromak ninian no servisu lori komunidade nia naran ka representante komunidade nian, ita hotu hola parte iha ne’ebé. Iha komunidade ne’ebé moris nafatin ho domin, lao tuir naffatin ita nia karizma no ita nia fundador/a sira nian, se wainhira ita moris iha: dahuluk mak ‘orasaun’. Iha leitura sira ita rona; primeira leitura no Evanjellu sempre koalia kona ba orasaun. Iha orasaun atu halo saida? Atu fo agradese ba Nai Maromak. Iha primeira leitura S. Paulo dehan: ‘Hau fo agradese nafatin ba Maromak wainhira hau hanoin imi no wainhira hau reza ba imi, hau reza ho ksolok’ (Fil. 1:3-4). Leitura ne’e kona los ba diretor/a sira, katak sira reza ba Maromak hodi hanoin ba nia membru sira. Ema barak husu tamba ema didiak sira ne’e hakarak sai relijiozu/a hodi ba moris mesa-mesak iha komunidade? Ba ema leigo sira la komprende kona ba saida mak moris komunidade. Maibe Maromak ispira ema ida-idak la hanesan. Ba ita Maromak halo ita komprende dalan ne’ebé ita hili no tuir atu ba haklaken Maromak nia reino. Katak buat hotu-hotu tenke ba ho Santidade maibe santidade ne’ebé liu husi dalan ne’ebé la hanesaan. Iha orasaun ita mos reza ba ema seluk, ba ita niamaun no bin alin sira seluk no ba ema hotu. Daruak mak ‘apresia ba malu’. Iha ita emania moris susar tebtebes atu apresia maibe iha buat ruma ita buka atu hatun malu. Lolos ita tenke apresia malu, buat ne’ebé ninian ita nian mos. Talentu no kapasidade sira ne’ebé ema ida iha sai mos ita nian. nune’e S. Paulo mos dehan: ‘Hau labele haluha buat hotu ne’ebé imi halo no fahe ho hauwainhira ita servisu atu haklaken Evanjellu; hori uluk to’o ohin loron’. (Fil. 1:5). S. Paulo apresia ema sira ne’ebé servisu hamutuk ho nia. Ita presiza apresia malu no fo suporta ba malu atu moris iha ksolok laran iha komunidade. Ikus mak ‘tulun malu’, Jesus dehan: ‘Mai besik Hau imi hotu kole no terus; Hau sei fo kmaan ba imi. Imi simu Hau nia ukun ba hodi banati tuir Hau, tan Hau laran kmaus no haraik-an’ (Mt. 11:28-29). Atu dehan Jesus bolu ita besik ba Nia atu tulun ita, nune’e mos ita tenke tulun malu. Nu’udar bin no maun alin iha komunidade ita presiza tulun malu, fo suporta ba malu hodi hatudu Kristu ba ema seluk liu husi moris Komunidade. Wainhira ita han hamutuk no reza hamutuk nafatin halo ita sente ita moris iha komunidade. Nu’udar komunidade relijiozu/a ita imita nafatin ho Kristu, moris nafatin tuir Kristu atu haklaken Maromak Nia domin ba ema hotu”.
Me. Evangelina mos hato’o liafuan agradese nian hodi dehan: “Ha’u agradese imi ida-idak ba imi nia domin, haka’as-an, sensu hola parte ba Komunidade. Durante ne’e ita lao hamutuk, buras hamutuk. Furak tebes wainhira ita hanoin hamutuk, servisu hamutuk nu’udar sinodalidade katak hau la lao mesak maibe imi hotu iha hau niasorin. Ida ne’e hanesan grasa bo’ot ida. Iha komunidade ne’ebé bo’ot maibe hau sente imi hotu hamutuk ho hau hodi suporta malu. Maski ita la hanesan maibe ita bele moris hamutuk iha komunidade. Ho Maromak nia grasa halo ita sai pasiensia liu tan ba malu, fo tempo ba malu hodi fahe ksolok no terus ba malu. Importante mak ita nafatin hamutuk. Wainhira ita hamutuk, sala ita sala hamutuk no loos mos ita loos hamutuk; hasoru terus mos ita hamutuk no ksolok mos ita hamutuk. Hau agradese tebes ba buat hotu ne’ebé ita fahe ba malu. Maromak sei tulun ita iha moris hamutuk ida ne’e. Obrigada”.
Dala ida tan hamutuk ita agradese ba domin nu’udar bin alin iha tinan ida ne’e. Maromak sei habo’ot liu tan nia domin mai ita no ba ema hotu ne’ebé ita hasoru. Obrigada
Noémia de Deus, FMA.
