Kapítulu Jerál online
Roma – Iha kronograma Kapítulu Jerál nian kontempla loron dedika ba enkontru ho leigu/a sira no loron enkontru ho foin-sa’e sira. Objetivu ba enkontru ho tema “Hamutuk nu’udar komunidade edukativa”, mak rona foin-sa’e sira no leigu sira ne’ebé partilla ho FMA sira misaun edukativa iha parte oioin mundu nian no husik atu sira-nia reflesaun interpela”.
Prezensa leigu sira-nian no foin-sa’e sira husu FMA sira atu rona basá Na’i ko’alia mós liu husi sira. Esperiénsia ne’e sei sai ba partisipante hotu enrikesimentu resíproku.
Enkontru ne’e hahú husi 9 to’o 12 Outubru. Loron ho leigu/a sira hahú ohin iha tuku 6 loraik ho boas-vindas husi Madre Jerál, Madre Yvonne Reungoat, hafoin kontinua ho koñesimentu resíproku anima husi Ir Paola Casalis husi Inspetoria Piemontese, Itália. Leiga/leigu sira prezente tuir Konferénsia Inter-Inspetoriál mak Natalie husi CIAM (Gabon), Nerissa husi CIAO (Filippinas), Silvina husi CICSAL (Argentina), Ammou husi CIEM (Belgica), Amalia husi CIEP (Espanha), Stefania husi CII (Italia), Adele husi CIMAC (Mexico), Erick husi CINAB (Bolivia), Barbara husi NAC (USA), Giovenali husi PCI (india), Guido husi Asosiasaun Vides Internacionale. Aban sei mai tan leiga na’in tolu husi Salezianu Kooperadora, husi Antiga aluna no ida tan husi CIB/Brasil. Hotu tiha momentu animasaun badak atu koñese malu, iha-ne’ebé leigu sira aprezenta sira-nia an, kontinua ho orasaun Vésperas espesiál anima husi CIAM (Konferénsia Inter-Inspetoriál Áfrika).
Madre Yvonne hateten ba leigu/a sira: “Ami loos duni haksolok liu bele realiza enkontru ne’e ho imi hotu mai husi kontinente oioin, husi Konferénsia Inter-Inspetoriál oioin, atu bele moris momentu interkulturál , intervokasionál, maibé liuliu salezianu”. Ne’e mak enkontru ida ne’ebé FMA sira hakarak tebes, basá “karizma salezianu tomak mak enkontru, relasaun”, Madre Yvonne kontinua. Nia hein atu enkontru profundu ne’e bele hamosu “tubun foun ida”, la’ós de’it iha Institutu FMA, maibé ba komunidade edukativa tomak iha mundu, nune’e bele sai “sinál ida, ahi-lakan ki’ik-oan ida iha Kreda, iha mundu, partikularmente ba mundu juveníl no ho mundu juveníl”.
Hakaran atu rona lia husi leigu sira, tanba, tuir Madre Yvonne, iha komplementariedade, iha hariku malu, mak Na’i halo mosu vida foun. “Ohin loron ita presiza sai hamutuk atu esperansa sai forte no hamutuk ita bele la’o hamutuk hamutuk ho joven sira iha naroman esperansa nian”.
Iha ninia liafuan bemvinda/u nian La Madre subliña atitude ruma presiza asume iha enkontru FMA-Leigu-Joven sira: ida mak atitude disponibilidade no liberdade interiór boot atu simu don hotu ne’ebé sei oferese, konxiente katak Na’i rasik mak ko’alia mai ita. Hamutuk ho atitude dahuluk presiza rona kle’an, atu bele halo diálogu. Atitude ksolok nian importante liu, “basá bainhira iha ksolok ita disponivel liután, ita sai atentu liután, basá ita iha dame”. Atitude konxiénsia nian katak ita halo daudaun dalan ida, maibé la’ós de’it dalan ida Institutu nian maibé dalan ida Kreda nian. Atitude seluk mak konfiansa resíproka, tanba ita bele konta ho ema seluk nia apoiu, “iha domin salezianu entre ita, ita bele konfia malu”, basá “ita hotu, Madre kontinua, simu vokasaun saleziana” tuir ita ida-idak nia estadu moris nian.
Madre Yvonne salienta katak, “Don Bosco iha paixaun boot atu serbisu ho leigu sira, ho kategoria sosiál oioin, husi relijiaun oioin, tanba ninia domin ba joven sira boot liu, nune’e husi kedas hahú nia hatene katak nia labele halo mesak, no envolve kedas leigu sira no ema hotu ho vontade di’ak”. Ne’e mak ita hakarak halo ohin, atu sai sinál profétiku esperansa nian, tulun jerasaun foin-sa’e atu hetan sentidu ba moris, atu hasoru Jezús iha sira-nia moris.
Molok remata, La Madre hateten katak, trata tema “Sai ho foin-sa’e sira uma ne’ebé evanjeliza”, imposivel halo lahó leigu/a sira, lahó foin-sa’e sira. “Hamutuk mak ita sai uma, hanesan ne’e mós ita ida-idak mak uma, uma ne’ebé Maromak horik bá, uma ne’ebé ema barak seluk horik bá, uma ne’ebé hakarak sai boot ba beibeik, maksimuk ba beibeik, iha-ne’ebé ema barak bele sente di’ak”.
