Venilale, 24-04-2021. Ita lao hela iha tempu pandemia covid-19 nian maibe ami la lakon esperansa no domin nune’e ho fuan nakonu ho ksolok no gratidaun ami irman, formande iha komunidade Maria Auxiliadora hamutuk ho labarik orfaun sira selebra festa agradesimentu Madre Jeral nian, molok to’o ba selebrasaun festa nian ami halo Lectio Divina kona ba Pesca Milagrosa (Jo. 21,1-21) ne’ebe prepara husi sentru, ami halo konkursu kona ba Madre Jeral nia moris no mos jogus oin-oin ne’ebe prepara atu halo ami irman, formande no labarik sira sente liutan klima festa nian, hafoin taka ho selebrasaun Eukaristia ne’ebe preside husi padre Olivio da Costa, sdb iha salaun orfanatu Sao Domingos Savio. Baseia ba Evanjellu ne’ebe guia festa gratidaun ida ne’e padre fahe ninia reflesaun hodi dehan: festa ida ne’e mak selebrasaun komuniaun nian ba FMA hotu nu’udar rede ida ba kultura moris nian, tamba ne’e selebrasaun komuniaun nian ida ne’e ita hare husi:
@ Milagre: ne’ebe akontese ba Apostulu sira, sira hetan ikan barak (Misaun)
@Jesus Nia han hamutuk ho eskolante sira ( Eukaristia)
@Dialogu:Jesus Nia dialogu ho Pedro (domin ne’ebe iha relasaun ba malu)
Ne’e mak sai elementu esensial ba Kreda nia moris basa atu ita nia misaun bele fo fuan presiza hamutuk nafatin ho Jesus hanesan apostulu sira ne’ebe hamutuk ho Jesus sira hetan ikan wain; selebrasaun komuniaun nian ida nee hamutuk ho Jesus no mos ema seluk no dialogu sira ne’ebe ita halo ninia sentru nafatin iha domin. Ohin loron mai ita hanoin no hare ba Madre Jeral ninia prezensa hanesan Jesus nian ne’ebe liga ita hamutuk, ligasaun ida ne’e ita halo husi Eukaristia Santa.Nune’e mai ita reza ba Madre atu nia hetan saude diak nafatin, no Maromak haraik ba nia sabedoria no matenek atu kontinua guia nafatin irman sira.
Iha lorokraik ami mos reza tersu serenata ne’ebe ami prepara hamutuk hodi reza Madre Jeral nia intensaunnoa saude no amos reza ba kontinente 5, remata tersu labarik sira komprimenta Madre Jeral husi sira nia dialogu badak no dansa hodi espresa sira nia domin ba Madre hodi dehan: OBRIGADA MADRE BA ITA NIA DOMIN NE’EBE FO MAI AMI, hafoin labarik sira ida-idak simu sira nia prezente ba Jogus nian nakonu ho ksolok.
Obrigada Madre Yvonne, ita nia Prezensa ne’ebe hanesan Madre Mazzarello nian hodi guia ami FMA ida-idak atu sai fiel no metin iha Karisma Salesiana liu-liu ba ita nia domin, liafuan no hanorin sira ne’ebe fo mai ami atu ami nia misaun bele fo fuan wain liutan atu dada foin-sa’e no labarik sira Jesus.
Obrigada ba ita domin ne’ebe la sura kolen hodi guia Institutu iha momentu susar ida ne’e.
Husi fuan ami dehan: GRAZIE MADRE YVONNE! No Boas Festa ba ita hotu.
Obrigada barak!
Cesarina Correia, FMA
