Dili – Eskola Maria Auxiliadora ohin, 17 Novembru 2017 mak selebra tinan 140 espedisaun misionária FMA. Maske tarde maibé Eskola Maria Auxiliadora lakohi lakon oportunidade di’ak ne’e hodi agradese ba madre Misionária sira ne’ebé agora iha rai misaun liuliu iha rai Timor, liu husi misa hamutuk ne’e atu hanoin fali madre sira nia saran-an tomak hodi ba rai misaun. Misa ne’e halao iha iha Gym Eskola Maria Auxiliadora no prezide husi Padre Mario do Rosario SDB.
Molok Missa hahú ho prosisaun hodi lori símbolu sira Misionária nian mak hanesan:
- Bíblia : mak nudar Maromak nia mandatu ba Nia eskolante sira ne’ebé dehan “ lao ba mundu tomak ba haklaken lia foun di’ak ba buat hotu-hotu”.
- Ánkora no fitun : mak simbolu instituto FMA nian nudar impulsu Misionária maka’as.
- Globu : signifika : liu tiha tinan 5 harii Institutu, FMA nakloke ona ba misaun Ad-jentes. liu husi ne’ebé Don Bosco nia komunikasaun ba Misionária FMA ninia desizaun kona ba FMA sira ninia partensa dahuluk iha Amerika: sira sei ba iha Uruguay.
- Naran no foto Irmán Misionária sira iha kuadru ida ; sira mak Irmán dahuluk ne’ebé konsagra-an ba misaun estranjeiru atu haklaken Jesus ba ema hotu, ba klamar sira nia salvasaun no liu liu ba labarik feto sira. Ho objetivu serbi Maromak nia povo.
- Konstituisaun ,nu’udar kongregasaun nia regra sira atu estuda no moris tuir iha moris loron loron.
Iha padre nia omilia nia dehan “ita agradese ba madre misionária sira liu-liu Madre Mazzarello basa husi nia mak ohin loroita hasoru madre misionária FMA sira iha ita nia le’et”. Padre dehan tan “sé mak Misionária sira ne’e? Sira mak : ema sira ne’ebé halo tuir maromak nia 
hakarak hodi konsagra-an tomak ba Maromak atu serbi no haklaken Jezús ba ema hotu”. Parte segundu padre ko’alia mós kona leitura no Evanjellu ohin nian, ne’ebé dehan: Maromak nia hahalok kmanek liu no Nia hakiak buat hotu, no buat hotu nia nain mak Nia. Iha Evanjellu padre sublina kona ba “ ema ne’ebé hakarak soi nia moris, sei lakon moris ne’e maibé ema ne’ebé lakon nia moris sei hatan moris ne’e. Ikus nia Padre konta istoria ida kona ba leaun ne’ebé hanoin aat animál sira seluk atu han mate de’it animál hotu ne’ebé nia hasoru, ikus mai nia rasik tama iha fatin a’at monu iha kuak laran no mate. Nia mensajen mak nu’udar ema ita labele hanoin aat ema seluk no respeita Maromak nia kristaun sira. Se lae ita rasik sei tama iha buat aat, ne’ebé ita halo ba ema seluk. Iha istoria ne’e hanorin ita atu hanoin di’ak no halo di’ak ba ema hotu ne’ebé ita hasoru. Nune’e mós tulun labarik sira atu hanoin di’ak ba nia- an- rasik no ba ema seluk hodi haree nu’udar Maromak nia kriatura.
(Grinalda da Costa)
