Venilale – Tama iha selebrasaun tinan 25 Vida Konsagrada nian, Irmán Alexandrina Pinto FMA, Irmán Jacinta Maria Gusmão FMA, Ir Olga Belo no Irmán Floriana Guterres (matebian) nian, enkontru ho feto-raan sira ne’ebé tama iha grupu vokasionál. Loron ne’e hahú kedas ho atividade promósaun vokasionál ne’ebé partisipa husi menina sira hamutuk 90 resin. Menina sira-ne’e hola parte ba komunidade FMA iha Inspetoria no mós husi eskola sekundária ruma. Tema eventu ne’e mak “Vokasaun Jonas nian, Saun Paulo nia vokasaun no konversaun no Na’i-Feto nia vokasaun. Animadora enkontru ne’e nian mak foin-sa’e sira husi komunidade Madre Mazzarello, Venilale no fasilitadora mak Irmán jubilár sira. Enkontru hahú ho benvinda husi provinsiál FMA TIN, Alma Castagna, ne’ebé husu ba foin-sa’e sira motivu saida mak sira halibur hamutuk iha fatin ida ne’e. Motivu ba enkontru ne’e mak selebrasaun tinan 25 vida relijioza Irmán dahuluk Timor-oan sira nian no sínodu ba foin-sa’e mundiál ne’ebé sei hala’o iha fulan Outubru mai ne’e ho tema: “ Rona, fiar no dixernimentu vokasionál”.
Depoizde “unfreezers no benvinda”, foin-sa’e sir aba iha grupu rasik atu halo hakle’an Jonas, Paulo no Maria nia vokasaun. Han kalan hotu tiha mak sira halo momentu orasaun, prepara husi Ir Jacinta Gusmão. Durante orasaun, Irmáns jubilár no reprezentante foin-sa’e nain tolu fahe sira-nia esperiénsia rasik.
Irmán Olga Belo, FMA ko’alia kona-ba Profeta Jonas ninia vokasaun no misaun ( Jonas 1:1-12), hodi liga ninia esperiénsia vokasaun,ne’ebé hetan tulun husi espirituál husi amululik Salesiano na’in tolu ne’ebé inspira nia atu deskobre loloos nia vokasaun. Padre sira ne’e mak: Padre Rolando, Padre João de Deus no Padre Locatelli. TuirIr Olga, nia la sente hakmatek wainhira halai sees bebeik husi bolun ida ne’e, no sente hakmatek liu wainhira nia fila no hatán ba bolun ida ne’e.
Irmán Jacinta Maria Gusmão, FMA fahe ninia esperiénsia liga ho S. Paulo nia vokasaun no konversaun, ba Saun Paulo nia orijen no abut, nia ema Ebreu perfeitu relijiozu no Doutór Lei nian, ema ne’ebé fiar-na’in wainhira nia hanoin buat ne’e justo nia halo ho fiar an, iha momentu ne’ebé nia hetan Kristu nia totalmente konverte-an tuir Kristu ho radikal. Liga ho Irmán Jacinta nia vokasaun. Nia mai husi família ne’ebé iha abut relijiozu metin, fiar-na’in no nia rasik iha idealizmu ne’ebé aas no sente katak buat ne’ebé loos nia halo ho konviksaun. Iha buat hotu ne’e Maromak koko nia ho moras ida, ne’ebé halo nia sai fraku, no momentu ne’ebá, nia totalmente entrega-an iha Maromak nia liman hodi tau konfiansa tomak iha Maromak. Ir Jacinta hatutan tan katak ita la merese atu konfia-an demais maibé konfia iha Maromak, tanba buat hotu mak Maromak nia prezente.
Irmán Alexandrina Pinto FMA fahe ninia esperiénsia hodi liga ho Na’i-Feto nia vokasaun. Alexandrina sente katak ninia moris dook husi sidade. Nia deskobre ninia vokasaun liuhusi Padre João de Deus, nia promosaun vokasionál iha nia suko, husi ne’e nia hili atu hatán ba Maromak nia bolun no hakarak sai madre Salesiana ida. Asosiasaun sira iha kreda ne’ebé nia partisipa iha nia vida juventude tulun nia deskobre mós ninia dalan vokasaun nian.
Hodi rona esperiénsia bíblika Jonas, Paulo no Maria Virjen nian, nune’e mós Irmán na’in tolu sira nia esperiénsia, foin-sa’e sira mós koko atu fahe sira nia mehi ba futuru, hodi sai relijioza, ka inan aman, depende totalmente ba Maromak no sira nia kolaborasaun liu husi atividade sira ne’ebé bele tulun sira iha misaun Salesiana.
(ComSoc FMA-TIN)
