“Hotu tiha ami-nia Ezersísiu Espirituál iha Mornese, ami simu grasa atu halo peregrinasaun ida ba Genova. Selebrasaun halo iha Portu iha tinan ida-ne’e, ne’ebé ita selebra tinan 140 enviu misionáriu dahuluk, sai partikularmente komovente.
Pesoalmente ha’u identifika an ho Madre Mazzarello ne’ebé akompaña Misionária dahuluk sira iha moemntu atu bá. Difisil tau an iha nia fatin no liuliu tama iha ninia fuan Inan nian. Iha ha’u-nia fuan ha’u sente emosaun boot no ksolok kle’an ida difisil atu haktuir. Ha’u agradese Na’i ba esperiénsia boot ninia konfiansa iha Na’i no ba Madre Mazzarello ninia barani iha fiar ne’ebé haruka grupu dahuluk ninia oan-fetos ira iha Amérika. Nia matan moris ba detalle hotu atu buka fasilita Irmán ida-idak nia viajen. Aventura boot no nia para iha partikulár sira ne’ebé esprime domin, delikadeza ba ida-idak. Ha’u hanoin katak Irmán sira mós sente emosaun maka’as iha momentu husik Madre no ró hahú la’o, hodi husik seguransa hotu iha kotuk no loke ba futuru foun ne’ebé Na’i loke daudaun iha sira-nia oin iha Amérika. Sira mós koko momentu ne’e ho ksolok boot ida: sente Jezús hadomi maka’as sira no bolu sira atu haklaken ksolok Evanjellu nian iha rai seluk-seluk.
Viajen ne’e sai inísiu aventura misionária boot ida ne’ebé halo Karizma dezenvolve iha mundu tomak, to’o rai ikun sira. Presiza barani atu hahú, atu bá ba dala uluk nian!
Don Bosco nia prezensa iha momentu partida misionária nian iha Portu Genova nian mós signifikativa liu no nia mós sente emosaun!
Emosaun mak sinál ida esperiénsia espirituál kle’an: Maromak iha ne’ebá! No buat hotu ba Ninia Reinu! Konfiansa iha Nia mak roman ne’ebé gia enviu no viajen.
Komovente mós faktu atu la husik misionáriu sira no misionária sira bá lahó Maria Auxiliadora! Ninia kompañia mak rikusoin importante liu. Ninia prezensa mak fonte seguransa no hakmatek nian, dame nian. Labele hanoin atu bá lahó Nia, Nia mak Inan!
Ha’u agradese Na’i tanba nia kontinua bolu Irmán sira husi mundu tomak ba Misaun ad Gentes tinan-tinan no ba ida-idak nia resposta jeneroza. Maibé ha’u husu mós atu bolu Filha de Maria Auxiliadora barak liután atu moris aventura misionária boot no furak liu ida-ne’e tanba nesesidade sira mundu tomak nian boot liu! Hanesan iha tempu misionária dahuluk sira-nian, ita simu bolun atu iha impulsu ba anúnsiu Liafoun Di’ak nian liuliu ba foin-sa’e feto no mane sira ne’ebé seidauk koñese Kristu no iha oportunidade uitoan de’it atu simu edukasaun evanjelizadora ida. Madre Mazzarello la hanoin rua-rua atu haruka Irmán sira ne’ebé nia bele presiza iha Mornese. Nia fahe husi pobreza inísiu Institutu nian. Pobreza ida-ne’e sai rikusoin ne’ebé hakbarak iha mundu tomak.
Ha’u husu Na’i vokasaun barak ba Institutu atu bele naksira Karizma nu’udar resposta ba nesesidade kle’an foin-sa’e feto no mane sira-nian iha mundu tomak.
Ohin-loron, ita simu bolun atu bá fiflafali ho audásia misionária hanesan no atu konvida foin-sa’e barak atu bá mós hamutuk ho ita! “Hamutuk ho foin-sa’e sira, misionária ksolok no esperansa nian”. Ita bá ho Maria Auxiliadora! Na’i hariak bensan mai ita!”
Sr Yvonne Reungoat
