Dili – Juniora mak irmán ho votu temporáriu ne’ebé hela iha komunidade idak-idak iha inspetoria nia laran hodi hola parte iha komunidade nia moris no ninia misaun nu’udar FMA.
Iha loron 5 Juñu irmán juniora sira hamutuk 17 hala’o sira nia enkontru formativu ikus nian ho madre Alma Castagna nu’udar Pronvinsiál no madre Esmeralda Soares husi ekipa formasaun nian.
Enkontru hahú ho adorasaun Santíssimu Sakramentu hodi hanoin mós festa Jezús nia Futar Isin no Raan nian, prepara husi komunidade Maria Auxiliadora. Ho adorasaun ida ne’e tulun ami atu reflete ami idak-idak nia moris ho pergunta: “bá sé mak ha’u iha ne’e? No atu bá ne’ebé? “.
Hotu tiha adorasaun madre provinsiál fó hanoin mai ami kona-ba ami nia relasaun no aplikasaun sira ne’ebe ami halo ona.
Nu’udar Buona Notte, ami haree video labarik ida husi Iran ne’ebá sai husi uma hamutuk ho família sira tanba ISIS tama sira nia rai. Iha entrevista husi televizaun kona-ba labarik ne’e, haree oinsá labarik ida ho tinan 9 maibé hatene ko’alia kona-ba ninia fiar iha Maromak no Jezús Kristu.
“Ha’u agradese Maromak tamba Maromak tau matan nafatin mai ami loron-loron. Iha ha’u nia uma ha’u halimar hamutuk ho ha’u nia kolega sira dala ruma ami baku malu maibé ami perdua malu nafatin”.
Labarik ida ne’e sai nu’udar ezemplu ema fiar nain nian no Edukadora nian.
Loron tuir mai, loron 6, ami hahú ho meditasaun. Leitura ne’ebe ami medita foti husi Apokalipse 3:14-22.
Maromak nia Liafuan ida-ne’e nu’udar termómetru ida atu ami sukat ami-nia moris nia temperatura: “manas ka malirin ka morna de’it”. Nia Liafuan haksiak ami mak liafuan Aman ida-nian ne’ebé eduka nia oan sira tan hadomi.
Hafoin ami kontinua ho reflesaun hodi hatán ba perguntas sira ne’ebe ami simu husi sentru kona esperiénsia junioradu nian. No ikus ami haree fali ami-nia iteneráriu ne’ebé ami halo tiha ona.
Ami agradese ba madre Provinsiál no ekipa formasaun tomak ne’ebé nafatin hala’o enkontru formativu ida ne’e mai ami. Ami haka’as an atu hadi’ak liután moris ida-ne’e atu bele sai nakonu ho Da mihi Animas.
(Alice Filipe Gama)
