Dili – “Ha’u sei agradese Na’i oinsá”, ne’e mak leitmotiv ba selebrasaun ohin agradesimentu nian ba Ir Paola Battagliola hamutuk ho Família Saleziana, belun no benfeitór/a sira hotu. Marka prezensa partisipante atus rua resin, ema Governu eh Kreda nian, leigu/a eh relijiozu/a sira, foin-sa’e sira eh kabe-na’in sira, maibé hotu-hotu hamutuk atu agradese misionária ki’ik-oan maibé ho fuan no neon boo hodi haburas Na’i nia misaun liuhusi karizma salezianu ho oin femininu. Agradesimentu ne’e sai mós momentu despedida ba Ir Paola Battagliola ne’ebé remata nia misaun iha Timor-Indonesia hodi simu knaar foun nu’udar Konselleira Jerál Institutu FMA nian.
Agradesimentu aas liu mak Eukaristia, nune’e, lokraik ne’e hahú ho selebrasaun eukarístika prezide husi padre Apolinário Neto SDB no konselebra husi amlulik seluk. Leitura loron nian aprezenta Maria nia disponibilidade ba Maromak nia planu hodi hatán “sin”. Nune’e mós Ir Paola, maski nia iha nia mehi, maibé nia pronta ba Maromak nia mehi ba nia, hanesan Pe. Apolinário dehan iha ninia omilia. Karakterístika ida Pe. Apolinário salienta husi Ir Paola mak ninia maternidade, tau matan no dedikasaun ba foin-sa’e sira no ba irmán sira.
Hafoin momentu tuirmai mak jantár konfraternizasaun nian halo iha klima familiár. Durante konvíviu, reprezentante sira ida-idak hato’o sira-nia liafuan agradese no hato’o lia-menon atu keta haluha Timor-Leste.
Liafuan ikus husi Ir Paola mak liafuan memória nian kona-ba ninia esperiénsia misionária iha inísiu. Nia hateten katak “Timor sai eskola atu aprende sai misionária”. Iha-ne’e tenke aprende sai koziñeira, modista, enfermeira… Husi labarik sira mak aprende lia-tetun, aprende sai inan, ko’us sira…; aprende atu sai saleziana misionária. Ir Paola mós kaer fali liafuan “Oinsá ha’u agradese Na’i, tanba Nia haruka ha’u foin-laek mai nu’udar misionária; oinsá agradese Kreda, Povu Timor no foin-sa’e sira ne’ebé simu sira nu’udar misionária FMA dahuluk, família señor Aleixo Ximenes nian ne’ebé oferese sira-nia uma nu’udar uma dahuluk; salezianu sira ne’ebé sai apoiu boot iha inísiu no prepara ona fini vokasaun nian no ba foin-sa’e feto sira ne’ebé hakarak sai saleziana no ba kedas hela hamutuk ho sira”… Ba irmán Paola, “Maromak mak halo buat hotu no liuhusi Maria nia tulun” no sira mak “instrumentu ki;ik de’it” Na’i uza.
Pe Joaquim Sarmento SJ, ne’ebé remata momentu konvíviu ho bensan finál, molok nia mós agradese kontribuisaun Ir Paola no iha nia misionária hotu ne’ebé saran moris no dedika an ba rai Timor; ba Ir Paola ne’ebé iha tinan 26 hola parte ida istória importante Kreda no nasaun nia kreximentu. Ba nia bensan hotu atu bele kontinua saran nia an ba ema wain liután atu sira hetan rahun di’ak husi no moris naresin.
