Dili – Loron 25 Juñu 2017 mak loron espesiál ba ami nia komunidade FMA Balide, tanba loron ne’e sai nudar loron agradesimentu Komunidade nian. T uir tradisaun saleziana nian ne’ebe Don Bosco rasik hanorin ba nia oan sira uluk nanain agradese Maromak ba prezensa Superior/ a iha komunidade laran, tan ne’e tema ba ami nia festa agradesimentu tinan ne’e nian mak “Ho fuan Oratorianu ami hato’o Obrigada”. Festa ne’e nia sentidu mak agradese ba Irma Alexandrina nia prezensa nudar Superiora, Inan, bin, Animadora e belun ba Irma ida-idak iha komunidade laran, Foin-sa’e no labarik sira ne’ebe hola parte ba komunidade FMA Balide
Sentru husi festa ne’e mak Eukaristia ne’ebe sai bee matan ba ami nia agradesimentu loro-loron nian. Ami nia agradesimentu uluk nanain ba Maromak ne’ebe bolu ami ida-idak atu hela hamutuk nudar biin-alin iha komunidade ida nia laran hodi halao misaun tuir karizma fundadadores sira nian, no mos agradese ba Superiora tanba nia mak talin komuñaun nian iha Irma sira nia le’et, no kolabora ho laran tomak iha misaun komun. Ho razaun ida ne’e mak ohin ami hahu festa ne’e ho Eukaristia Santa ne’ebe prezide husi Padre João Boavida, Sdb.
Iha parte omilia, padre ko’alia kona tema ne’ebe hili ba festa agradesimentu komunidade nian ne’ebe dehan“ Ho Fuan oratorianu ami hato’o Obrigada”. Tema ne’e liga ho Spiritualidade Don Bosco no Madre Mazzarello nian iha Valdoco no Mornese ne’ebe dala uluk hahu ho foin-sa’e sira iha Oratóriu to’o tempu agora, sei kontinua halao tradisaun ne’e iha uma Saleziana tomak.
Iha Pontus ha’at ne’ebe dada ita hotu nia atensaun atu hatene no koñese ita nia Fundadores sira nia Spiritualidade liu husi esperesnsia hirak ne’ebe ita mos koko ona moris tuir iha ita nia ambiente sira mak:
- Esperiésia Valdoco no Mornese mak sai nudar fatin ka uma Salesiana nian ne’ebe simu foin-sa’e hotu-hotu ne’ebe tama iha ne’eba. Uma Balide sai mos sentru ba foin-sa’e sira ne’ebe mai iha fatin ne’e atu aprende no liu-liu ba foin-sa’e sira nia diak,
- Uma Saleziana bazeia ba esperiésia Valdoco no Mornese nian mak sai nudar Eskola ida ne’ebe eduka foin-sa’e sira laos deit atu hatene kona ba abilidade tekniku nian maibe liu-liu atu eduka foin-sa’e sira ba moris.
- Uma saleziana nian sai hanesan parokia ida ne’ebe Evanjeliza ou hanorin Foin-sa’e sira ba Maromak, tan ne’e mak iha uma Saleziana hotu iha kapela, iha atividade spiritual nian ne’ebe favoreze ba foin-sa’e sira ne’e. Fundadores sira nia hanorin liu-liu kona ba Maromak , ida nee mak fundamental moris sarani ida nian.
- Oratóriu sai kampu halimar nian iha ne’ebe foin-sa’e sira hasoru malu no habelun ho foin-sa’e sira seluk no sai mos fatin haksolok nian ba foin-sa’e sira.
Esperiénsia hirak ne’e hanorin ita atu lalakon ita nia Espiritualidade ne’ebe ita nia fundadores sira husik hela mai ita, maibe koko atu moris tuir nafatin tanba ida nee mak nudar riku soin boot ida ba ita hotu.
Bainhira remata tiha Eukaristia hahu kedas ho konviviu husi Oratorianu Balide, Irman sira no mos Oratorianu Dejudil , tanba tema principal ba festa ne’e mak “ Fuan Oratorianu”
Irman, Foin-sa’e no Labarik sira nia ksolok hatudu liu husi dansa, dramatiza jestu sira tuir tempu Oratóriu dahuluk nian kona ba Sosiedade de alegria iha Doon Bosco nia tempu. Hatudu mos Iha tempu modernu nian fuan Oratóriu nian hatudu liu husi foin-sa’e sira iha ofisina, sentru de Formasaun, Orfanatrofiu, natar ou Estrada tuir ida-idak nia situasaun. Hahalok hotu ne’e mak asigura katak ita kaer metin nafatin tradisaun Valdoco no Mornese nian iha ita nia tempu ohin loron. “Ho Fuan Oratorianu nian ami hato’o Obrigada “.
(Ines Bartolo)
