Maun no biin-alin sira, buongiorno!
Domingu kotuk ita hahú Adventu ho konvite atu sai vijilante; ohin, domingu daruak tempu preparasaun ba Natál ida-ne’e, liturjia hatudu mai ita konteúdu própriu: tempu ida atu rekoñese mamuk sira ne’ebé tenke hakonu iha ita-nia moris, no hatetuk foho meik orgullu nian no halo espasu ba Jezús ne’ebé mai.
Profeta Isaías dirije ba povu hodi haklaken ézodu iha Babilónia nia rohan no sira nia fila-hikas ba Jerusalém. Nia profetiza: «Lian ida hakilar: “Prepara dalan ba Na’i iha rai-fuik maran […]. Rai naruk hotu sei hasae”» (40,3). Rai naruk sira atu hasae reprezenta mamuk sira ita-nia komportamentu nian iha Maromak nia oin, ita-nia salan sira hotu omisaun nian. Mamuk ida ita-nia moris nian mak faktu katak ita la harohan eh harohan uitoan. Entaun, adventu mak momentu di’ak atu harohan ho intensidade liután, atu rezerva ba vida espirituál fatin ne’ebé nia merese. Mamuk seluk mak falta karidade ba maluk, liuliu ema sira ne’ebé presiza liu tulun la’ós de’it materiál, maibé mós espirituál. Ita simu bolun atu matan moris liután ba ema seluk nia nesesidade sira, besik liután. Hanesan João Batista, ho modu ida-ne’e ita bele loke dalan esperansa nian iha rai-fuik maran sira iha ema barak nia fuan ne’ebé maran.
«Foho hotu no foho-oan sira sei hatun» (v. 4), Isaías ezorta tan. Foho no foho-oan sira ne’ebé tenke hatun mak orgullu, foti-an, prepoténsia. Iha-ne’ebé iha orgullu, iha-ne’ebé iha prepoténsia, iha-ne’ebé iha foti-an Na’i labele tama tanba nakonu ho orgullu, ho prepoténsia, ho foti-an. Tanba ne’e, ita tenke hatun orgullu ida-ne’e. Ita tenke asume atitude laran-maus no haraik-an nian, hdoi la hakilar, rona, ko’alia ho laran-maus no halo nune’e prepara ita-nia Makso’ik nia mai, Nia ne’ebé fuan maus no hariak an (kf Mt 11,29). Hafoin husu ita atu elimina obstákulu hotu ne’ebé ita tau ba ita-nia uniaun ho Na’i: «Rai ne’ebé kroat nakfilak iha tetuk no ida naruk sai laletek. Nune’e mak sei hatudu Na’i nia glória – Isaías hateten – no ema hotu hamutuk sei haree nia» (Is 40,4-5). Hahalok sira-ne’e tenke halo ho ksolok, tanba nia finalidade mak preparasaun Jezús nia to’o mai. Bainhira ihauma ita hein ema ita hadomi nia vizita, ita prepara buat hotu ho kuidadu no ksolok. Ho modu hanesan ita hakarak prepara an ba Na’i ne’ebé mai: hein Nia loroloron ho atensaun, atu Ninia grasa hakonu ita bainhira nia to’o mai.
Makso’ik ne’ebé ita hein iha kbiit atu nakfilak ita-nia vida ho nia grasa, ho forsa Espíritu Santu nian, ho forsa domin nian. Espíritu Santu, defaktu, hasuli iha ita-nia fuan sira Maromak nia domin, bee-matan rohan-laek purifikasaun nian, moris foun nian no liberdade nian. Virjen Maria moris nakonu realidade ida-ne’e, hodi husik Espíritu Santu “batiza” nia, Espíritu Snatu ne’ebé hakonu nia ho nia kbiit. Nia, ne’ebé prepara Kristu nia vinda ho nia ezisténsia tomak, tulun ita atu tuir ninia ezemplu no gia ita-nia ain-hakat sira bá hasoru Na’i ne’ebé mai.
