«Maun no biin-alin sira, bondia!
Evanjellu ohin nian (kf Jo 20,19-31) haktuir katak Loron Páskua nian Jezús mosu ba ninia dixípulu sira iha Senákulu, iha kalan, hodi lorin prezente tolu: pás, ksolok, misaun apostólika.
Liafuan dahuluk sira ne’ebé Nia dehan mak: «Pás ba imi» (v. 21). Ida-Ne’ebé Moris-Hi’as lori pás auténtika. Basá liuhusi ninia sakrifísiu iha krús nia realiza rekonsiliasaun entre Maromak no umanidade no manán salan no mate. Ida-ne’e mak pás. Ninia dixípulu sira, mak uluk liu iha nesesidade ba pás ida-ne’e, basá, depoizde ema kaer no kondena Na’i, sira monu iha konfuzaun no ta’uk. Jezús aprezenta an moris iha sira-nia leet no, hodi hatudu ninia kanek sira – Jezús hakarak konserva ninia kanek sira –, iha ninia isin glória nian, haraik pás nu’udar ninia vitória nia fuan. Maibé iha kalan ne’e apóstolu Tomé la prezente. Hetan tiha informasaun kona-ba eventu estraordináriu ida-ne’e, nia, fiar-laek ba Apóstolu sira seluk nia sasin, hakarak verifika ho nia an rasik lia-loos kona-ba buat hotu sira afirma. Liutiha loron ualu, katak hanesan ohin, aparisaun repete fali: Jezús bá hasoru Tomé nia fiar-laek, hodi konvida nia kona ninia kanek sira. Kanek sira-ne’e mak fonte pás nian, basá siira mak sinál Jezús nia domin boot ne’ebé halakon kbiit inimigu ema nian, salan, mate. Nia konvida atu kona kanek sira. Ne’ mak hanorin ida mai ita, hanesan Jezús hateten mai ita hotu: “Se ó la iha pás, kona ha’u-nia kanek sira”.
Kona Jezús nia kanek sira, katak kona problema wain sira, difikuldade sira, persegisaun sira, ema barak ne’ebé terus nia moras. Ó la iha pás? Bá, bá vizita ema ruma símbolu Jezús nia kanek nian. Kona Jezús nia kanek. Husi kanek sira ne’e suli sai mizerikórdia. Tanba ne’e mak ohin domingu mizerikórdia nian. Santu ida hateten katak Jezús nia isin hedi iha krús hanesan kaut ida mizerikórdia nian, ne’ebé liuhusi ninia kanek sira to’o mai ita hotu. Ita hotu presiza mizerikórdia, ita hatene. Mai ita hakbesik ba Jezús no kona ninia kanek sira iha maun/biin-alin sira ne’ebé terus. Jezús nia kanek sira mak rikusoin ida: husi ne’ebá suli sai mizerikórdia. Mai ita iha korajen no kona Jezús nia kanek sira. Ho kanek sira-ne’e Nia horik iha Aman nia futar oin, hatudu ba Aman, hodi hateten ba Nia: “Aman, ne’e mak presu, kanek sira-ne’e mak presu ha’u hodi selu ha’u-nia maun-alin sira”. Ho ninia kanek sira Jezús harohan daet iha Aman nia futar oin. Nia haraik mai ita mizerikórdia se ita hakbesik ba nia, no harohan daet mai ita. Keta haluha Jezús nia kanek sira.
Prezente daruak ne’ebé Jezús moris-hi’as lori ba dixípulu sira mak ksolok. Evanjelista refere katak «dixípulu sira haksolo bainhira haree Na’i» (v. 20). No iha mós versíkulu ida, iha Lucas nia versaun, ne’ebé dehan katak sira labele fiar tanba ksolok. Mai ita mós, bainhira mosu buat ruma inkredivel, furak, ita dehan: “Ha’u labele fiar, ne’e la loos!”. Nune’e mak akontese ho dixípulu sira, sira labele fiar tanba ksolok. Ida-ne’e mak ksolok ne’ebé Jezús lori mai ita. Se ó triste, se ó la iha pás, hateke ba Jezús hedi iha krús, hateke ba Jezús moris-hi’as, hateke ba ninia kanek sira no foti ksolok ida-ne’e.
No tuirmai, aleinde pás no ksolok, Jezús lori mós prezente misaun ba dixípulu sira. Nia dehan ba sira: «Nu’udar Aman haruka ha’u, nune’e mós ha’u haruka imi» (v. 21). Jezús nia moris-hi’as mak inísiu dinamizmu foun ida domin nian, ho kbiit atu nakfilak mundu ho Espíritu Santu nia prezensa.
Iha domingu daruak Páskua nian, ita simu konvite atu hakbesik ho fiar ba Kristu, hodi loke ita-nia fuan ba pás, ba ksolok no ba misaun. Maibé ita keta haluha Jez’us nia kanek sira, basá husi ne’ebá mai pás, ksolok no kbiit ba misaun. Ita konfia orasaun ne’e ba Virjen Maria nia intersesaun materna, liurai-feto lalehan no rai nian».
