Loron 26 Abríl data importante ba ita-nia Institutu: ita hotu hato’o ita-nia agradesimentu ba Madre Yvonne Reungoat, superiora jerál. Oras-ne’e nia iha ona Sam Phran, Tailándia, tanba festa agradesimentu nia fatin mak rai ne’e iha Ázia Orientál. FMA hotu, liuhusi inspetoria sira iha mundu tomak sai ida de’it hanesan ramallete ida, hamutuk iha diversidade, buka halo sira-nia moris oferta ida ksolok no esperansa nian. Ho Tinan mizerikórdia, ita buka la’o ho foin-sa’e sira iha dalan mizerkórdia no domin Maromak nian.
Ir Alma Castagna, provinsiál FMA TIN mós partisipa iha festa ne’e. Tanba ne’e mak ita bele iha notísia diretamente husi nia.
Sam Phran (Tailandia) – Iha Sam Phran, kalan ida ne’e antiga aluna barak hahú ona to’o tanba aban Madre sei halo enkontru ho sira: sira mai husi Tailandia tomak.
Iha Bonoite, Madre konvida ema hotu atu aban, nu’udar prepararsaun ba loron 26, ida-idak bele hanoin no reflete kona-ba Magnificat Maria nian; nia husu atu fó tempu ida ba Maromak hodi tuur hakmatek iha ninia Oin no hakerek buat ne’ebé deskobre. Objetivu atu halo buat ne’e mak aban, ida-idak bele hakerek ninia Magnificat hodi agradese Na’i ba buat furak barak ne’ebé Nia haraik iha ema ida-idak nia moris. Madre Jeral fó hanoin katak loron 26 la’ós de’it ninia festa, maibé ita hotu nia festa, nune’e ita presiza to’o loron ida ne’ebá ho fuan gratidaun nian. Nia husu mós atu harohan ba Maromak atu Nia bele hasai husi ema ida-idak nia laran, sentimentu no atitude sira ne’ebé sai obstákulu ba gratidaun; nune’e bele favorese katak liafuan agradesimentu la hela de’it nu’udar liafuan, maibé sai hahalok gratidaun nian.
Nia taka ninia Bonoite hodi halimar ho irmán tailandeza sira, tanba nia dehan katak se nia aban sei husu ba sira balun sira-nia Magnificat, sira tenke tradús ba nia, tanba nia seidauk hatene tailandés.
(Alma Castagna)
