Papa Francisco nia lia-menon molok reza Angelus iha Domingu Santíssima Trindade nian (30 Maiu 2021)
Maun no biin-alin sira, bondia!
Iha festa ne’ebé ita selebra Maromak : mistériu Maromak ida mesak. No Maromak ne’e mak Aman, Oan no Espíritu Santu. Pesoa na’in tolu, maibé Maromak ida! Aman Maromak, Oan Maromak, Espíritu Maromak. Maibé la’ós Maromak tolu: Maromak ida de’it iha Pesoa na’in tolu. Ne’e mistériu ida ne’ebé Jezús Kristu revela mai ita: Santa Trindade. Ohin ita para atu selebra mistériu ne’e, basá Pesoa sira la’ós adjetivu Maromak nian, lae. Sira mak Pesoa reál, lahanesan, diferente; sira la’ós – hanesan filózofu ida dehan – “emanasaun Maromak nian”, lae, lae! Sira pesoa. Iha Aman, ne’ebé ha’u harohan ho Ami Aman; iha Oan, ne’ebé haraik redensaun mai ha’u, justifikasaun; iha Espíritu Santu, ne’ebé horik iha ita no no horik iha Kreda. No ko’alia mai ita-nia fuan, tanba ita hetan nia iha espresaun S. João nian ne’ebé halo rezumu Revelasaun tomak: «Maromak mak domin» (1 Jo 4,8.16). Aman mak domin, Oan mak domin, Espíritu Santu mak domin. No nu’udar domin, Maromak, maski ida no úniku, la’ós solidaun maibé komuñaun, entre Aman, Oan no Espíritu Santu. Basá domin esensialmente mak don an rasik nian, no iha ninia realidade orijinál no intfinita Aman mak saran an hodi hahoris Oan, ne’ebé husi nia parte saran an ba Aman no sira-nia domin resíproku mak Espíritu Santu, tali sira-nia unidade nian. La’ós fasil atu komprende, maibé bele moris mistériu ida-ne’e, ita hotu, bele moris tebes.
Mistériu Trindade ida-ne’e Jezús rasik mak revela. Nia halo ita hatene Maromak nia futar oin nu’udar Aman laran-sadia; nia aprezneta An rasik, ema loos, nu’udar Maromak nia Oan no Aman nia Liafuan, Salvadór ne’ebé haraik nia moris mai ita; no nia ko’alia kona-ba Espíritu ne’ebé mai husi Aman no Oan, Espíritu Lia-Loos nian, Espíritu Paráklitu – ita ko’alia kona-ba ne’e iha domingu liubá, kona-ba liafuan ne’e, “Paráklitu” – katak Konsoladór no Advogadu. No bainhira Jezús mosu ba Apóstolu sira depoizde resurreisaun, Jezús haruka sira atu evanjeliza «povu sira hotu, hodi sarani sira hodi Aman no hodi Oan no hodi Espíritu Santu sira naran» (Mt 28,19).
Ne’e duni, festa ohin nian, halo ita kontempla mistériu maravillozu domin no roman nian ida-ne’e no ne’ebe husi nia mak ita mai no orienta ita-nia dalan iha rai.
Iha anúnsiu Evanjellu nian no iha forma hotu misaun kristán nian, ita labele ignora unidade ida-ne’e ne’ebé Jezús bolu ita, entre ita, tuir unidade Aman, Oan no Espíritu Santu nian: ita labele ignora unidade ida-ne’e. Fafurak Evanjellu nian husu atu ita moris – unidade – no fó sasin iha armonia entre ita, ne’ebé lahanesan liu! No iha unidade ida-ne’e ha’u brani dehan katak esensiál ba ema sarani, basá ne’e mak unidade ne’ebé moris husi domin, husi Maromak nia mizerikórdia, husi Jezús nia jusitifikasaun no husi Espíritu Santu nia prezensa iha ita-nia fuan sira.
Maria Santíssima, iha ninia simplisidade no haraik-an, reflete Maromak Ida no Tolu nia beleza, basá nia simu Jezús ho nakonu iha ninia moris. Atu nia tahan ita-nia fiar; halo ita sai adora-na’in Maromak nian no serví-na’in maun no biin-alin sira-nian.
