RV – Atu taka siklu katekeze nian kona-ba mizerikórdia iha Testamentu Tuan, Papa Francisco destaka katak Maromak nia perdaun boot liu ema nia salan. Nia reflete kona-ba mizerikórdia iha salmu 51.
Ne’e mak orasaun penitensiál ida, hahú ho konfisaun salan/kulpa nian, iha-ne’ebé harohan—na’in/orante husik atu Maromak nia domin purifika nia no halo nia sai kriatura foun. Tradisaun atribui salmu ne’e ba liurai David ne’ebé, depoizde halo adultériu ho Betsabé, hodi halo feto ne’e nia laen mate, profeta Natan tulun nia atu rekoñese ninia kulpa iha Maromak nia oin.
Salmu hahú ho liafuan sira súplika nian: “Ó Maromak, sadia ha’u, tuir ita-nia laran-sadia, ita-nia domin boot, hamoos ha’u-nia salan. Fase ha’u husi ha’u-nia salan hotu no purifika ha’u husi ha’u-nia salan”.
Papa Francisco esplika katak, iha orasaun ne’e hatudu ema nia nesesidade loloos: buat ida mesak ne’ebé nia presiza iha moris mak simu perdaun, liberta nia an husi aat no husi ninia konsekuénsia sira. Nune’e, salmu konvida ita atu iha David nia sentimentu sira, hodi rekoñese ita-nia mizéria sira no iha serteza kona-ba Maromak nia mizerikórdia. “Maromak boot liu ita-nia salan sira”. Amu-Papa afirma, hodi repete fraze ne’e dala barak no konvida ema lubun boot atu halo hanesan.
Aman nia fidelidade
“Maromak nunka husik mesak, bainhira perdua, nia kansela ita-nia salan sira, halo ita sai kriatura foun”, Papa Francisco hateten. Dignidade ne’ebé Maromak nia perduan haraik mak hamriik depoizde salan ida, Amu-Papa esplika, hodi haktuir buat ne’ebé salmista dehan: “Kria iha ha’u, ó Maromak, fuan moos ida, hafoun iha ha’u espíritu rezolutu ida. Ha’u hakarak hanorin ita-nia dalan sira ba sira ne’ebé naksalak no sala-na’in sira seli filafali ba Ita”.
Amu-Papa taka nune’e: “Ema maksalak hotu ne’ebé hetan perdaun simu bolun atu partilla don ne’e ho maun no biin-alin ida-idak nia hasoru, basá ema hotu, hanesan ita, presiza Maromak nia mizerikórdia. Perdaun purifika fuan no transforma moris”.
