Dili – Eskola Maria Auxiliadora Dili, iha loron 24 fulan-fulan halo enkontru formasaun profesór/a sira-nian. Iha enkontru 24 Outubru nian, kontinua tema eskola nian, eskola konvida Ir Jacinta Gusmão atu hato’o tópiku kona-ba “Escola Salesiana”.
Iha ninia input nia foka kona-ba “Identidade Eskola Salesiana nian”. Identidade importante liu atu diferensia ita-nia eskola husi eskola seluk: públika, privada eh katólika sira seluk, basá identidade eziste tanba eziste alteridade. Oinsá “Escola Base Maria Auxiliadora” distinge nia identidade husi eskola seluk? Ho eskola barbarak iha Dili laran, ho oferta oioin, oinsá ita define ita-nia an, oinsá ita aprezenta an? Sá loos kuadru finalidade, valór no metodolojia edukativa sira ne’ebé orienta no estimula ita? Ne’e mak pergunta ruma atu estimula hanoin.
Iha momentu dahuluk, Ir Jacinta Gusmão husu atu profesór/a sira diskute iha grupu kona-ba signifikadu termu “eskola, katólika, salesiana”. Saida mak define instituisaun ida nu’udar “eskola”, nu’udar “katólika” no nu’udar “saleziana”?
Hanesan dokumentu “Liña Orientadora Misaun edukativa FMA nian” n. 167 hateten eskola mak “fatin elaborasaun kulturál krítika no konstrusaun profisionalizmu nian…”. Katólika tanba nia fundamentu no inspirasaun mak valór sira Evanjellu nian. Saleziana tanba iha kbiit atu oferese formasaun integrál ema nia iha perspetiva sidadaun onestu no sarani di’ak, adopta estilu preventivu Don Bosco no Madre Mazzarello nian no promove ambiente edukativu iha-ne’ebé ema halo esperiénsia valór umanu no sarani sira (LOME n. 153).
Husi núkleu identidade ida-ne’e mak “Komunidade edukativa” bele aprezenta nia an ba kliente posivel sira kona-ba vizaun komún ne’ebé sira partilla, valór sira, misaun no vokasaun edukativa. Konserteza ita-nia oferta edukativa tenke hatán ba dezafiu no nesesidade sira territóriu nian, realidade lokál nian. Tanba serbisu kona-ba dezafiu sira, profesór sira halo ona iha momentu formasaun presedente ho “SWOT analysis”, iha momentu daruak, profesór/a sira fahe ba grupu lima atu halo leitura LOME nia kapítulu 2 (Prezente preferensiál ba foin-sa’e sira), 3 (Komunidade edukativa), 4 (Enkontru ho Jezús iha esperiénsia moris nian), 5 (Estratéjia prioritária sira) no 6 (pedagojia ambiente nian).
Ikusmai, Irmán Jacinta konvida atu profesór sira hamutuk ho FMA sira, inan-aman sira no foin-sa’e sira forma “eskuadra” ida, hanesan Reitór-Mor hateten iha Estréia 2015, atu bele la’o hamutuk iha konverjénsia ba to’o ba finalidade boot edukasaun nian. Profesór sira keta deskorajen se la haree kedas rezultadu husi sira-nia haka’as an… Labarik sira, adolexente sira, se haree ita-nia ezemplu moris nian la’o hamutuk ho ita-nia hanorin sira, fini ne’ebé ita kari sei la monu leet de’it.
(ComSoc FMATIN)
