Papa Francisco iha Angelus 30 Juñu 2014
Maun no biin-alin sira, bondia!
Husi kedas tempu antigu mak Kreda Roma nian selebra Apóstolu Pedro no Paulo iha festa ida de’it iha loron hanesan, 29 Juñu. Fiar iha Jezús Kristu halo sira sai maun-alin no martíriu halo sira sai buat ida de’it. S. Pedro no S. Paulo, ema la hanesan entre sira iha planu umanu, maibé Na’i Jezús pesoalmente hili sira no sira hatán ba bolun ne’e hodi oferese sira-nia moris tomak.
Iha sira rua hotu Kristu nia grasa hala’o buat kmanek, nakfilak sira. Nakfilak tebes sira! Simão nega Jezús iha momentu dramátiku paixaun nian; Saulo persege maka’as sarani sira. Maibé sira rua hotu simu Maromak nia domin no husik Ninia laran-sadia nakfilak sira; nune’e sira sai Kristu nia belun no apóstolu sira. Tanba ne’e mak sira kontinua ko’alia ba Kreda no ohin mós hatudu dalan salvasaun nian. Ita mós, se karik monu iha salan boot liu no iha nakukun kalan nian boot liu, Maromak nafatin iha kbiit atu nakfilak ita, hanesan nia nakfilak Pedro no Paulo; nakfilak ita-nia fuan no perdua hotu, hodi nune’e nakfilak ita-nia nakukun salan nian iha dadeersaan naroman nian. Maromak mak ne’e: nakfilak ita, perdua nafatin ita, hanesan Nia halo ho Pedro no hanesan Nia halo ho Paulo.
Livru Apóstolu sira-nia Hahalok hatudu karakterístika barak sira-nia sasin nian. Pedro, nu’udar ezemplu, hanorin ita atu hateke ba ema kiak sira ho matan fiar nian no haraik ba sira buat folin liu ne’ebé ita soi: kbiit iha Jezús nia naran. Buat ne’e nia halo ho ema ain-maten: fó ba nia buat hotu ne’ebé nia soi, katak Jezús (kf. Apóst 3,4-6).
Kona-ba Paulo, haktuir dala tolu mai ita epizódiu bolun nian iha dalan ba Damasco, ne’ebé marka virajen iha ninia moris, hodi haketak moris uluk no moris tuir mai. Uluk, Paulo mak inimigu boot Kreda nian. Tuir mai, nia tau nia ezisténsia tomak ba servisu Evanjellu nian. Mai ita mós enkontru ho Kristu nia Liafuan iha kbiit atu nakfilak kompletamente ita-nia moris. La’ós possivel rona Liafuan ne’e no hela metin iha fatin rasik, blokadu iha tomansira. Liafuan dudu ita atu manán egoízmu ne’ebé horik iha ita-nia fuan laran atu tuir desizamente Mestre ne’ebé haraik nia moris ba nia belun sira. Maibé Nia mak ho ninia liafuan muda ita; Nia mak nakfilak ita; Nia mak perdua tomak ita, se ita loke fuan no husu perdaun.
Maun no biin-alin sira, festa ne’e hamosu iha ita ksolok boot ida, tanba halo ita haree Maromak nia hahalok laran-sadia nian iha ema na’in rua nia fuan. Ne’e mak obra laran-sadia Maromak nian iha ema na’in rua ne’e, ema maksalak boot. No Maromak hakarak hakonu mós ita ho ninia grasa, hanesan Nia halo ho Pedro no ho Paulo. Virjen Maria tulun ita atu simu grasa ho fuan nakloke, atu la simu leet de’it! No tahan ita iha oras prova nian, atu fó sasin ba Jezús Kristu no ninia Evanjellu. Ita husu ho modu partikulár ba Arsebispu Metropólita sira ne’ebé iha tinan ikus simu nomeasaun, ne’ebé ohin dadeer selebra Eukaristia ho ha’u iha S. Pedro. Ita kumprimenta sira hotu ho afetu hamutuk ho sira nia sarani sira no familiár sira, no ita harohan ba sira!
