Maun no biin-alin sira!
Pasajen evanjélika domingu ne’e nian (kf Mt 18,21-35) oferese mai ita hanorin kona-ba perdaun, ne’ebé la nega buat ne’ebé sala maibé rekoñese katak ema, kria tuir Maromakn ia ilas, nafatin boot liu salan ne’ebé nia halo. S. Pedro husu ba Jezús: «Se ha’u-nia maun halo salan hasoru ha’u, ha’u sei perdua nia dala hira? To’o dala hitu?» (v. 21). Ba Pedro másimu perdua nian mak dala hotu ona ba ema hanesan; no mai ita dala rua mós parese barak ona. Maibé Jezús hatán: «Ha’u la dehan dala hitu, maibé hitunulu dala hitu» (v. 22), katak nafatin: ó tenke perdua nafatin. No konfirma hodi haktuir ai-kanoik liurai laran-sadia no atan laran-aat, ne’ebé hatudu inkoerénsia husi ida-ne’ebé hetan uluk tiha perdua hafoin lakohi perdua.
Liurai ai-kanoik nian mak ema laran-luak ne’ebé, tanba kompaixaun, kasu tusan boot liu – “talentu rihun sanulu”: boot liu – ba atan ida ne’ebé harohan ba nia. Maibé atan ne’e rasik, hetan atan seluk hanesan nia ne’ebé deve denáriu atus ida – katak uitoan liu –, nia hahalok kruél liu, hodi hatama nia iha kadeia. Atitude inkoerente atan ne’e nian mak ita-nia mós bainhira ita rekuza perdaun ba maun no biin-alin sira. Enkuantu liurai ai-kanoik nian mak ilas Maromak ne’ebé hadomi ita ho domin riku ho mizerikórdia atu simu ita, no hadomi ita no perdua kontinuamente.
Husi kedas ita-nia batizmu Maromak perdua ita, kasu tusan ida lahó solusaun: salan orijinál. Maibé, ida-ne’e mak dala uluk nian. Depois, ho mizerikórdia ida lahó limite, Nia perdua ita-nia salan hotu bainhira ita hatudu sinál ki’ik ida arrependimentu nian. Maromak hanesan ne’e: nia mizerikordiozu. Bainhira ita iha tentasaun atu taka ita-nia fuan ba ema ne’ebé ofende ita no husu deskulpa mai ita, ita hanoin ba Aman lalehan nia liafuan ba atan laran-aat: «Ha’u perdua ó-nia tusan hotu tanba ó harohan ha’u . Tanba sá makó la hanoin ó-nia maluk hanesan ha’u hanoin ó?» (vv. 32-33). Ema ne’ebé esperiemnta ksolok, dame no liberdade interiór ne’ebé hetan pedaun bele loke an ba posibilidade atu perdua mós.
Iha orasaun Ami Aman nian, Jezús hakarak hatama hanorin hanesan ai-kanoik ne’e nian. Nia tau iha relasaun direta perdaun ne’ebé ita husu ba Maromak no perdaun ne’ebé ita tenke fó ba maun-alin sira: «Haraik perdua mai am salan nu’udar ami fó perdua ba ema halo aat ami» (Mt 6,12). Maromak nia perdaun mak sinál nia domin naresin mai ita ida-idak; domin ne’ebé husik ita livre atu haddok an, hanesan oan ne’ebé halai husi uma, maibé Aman ne’e nafatin hein loroloron ita-nia fila-hikas; domin badinas bibi-atan nian ba bibi ne’ebé lakon; ternura ne’ebé simu sala-na’in ida-idak ne’ebé dere ninia odamatan. Aman lalehan – ita-nia Aman – nakonu, nakonu ho domin no hakarak oferese mai ita, maibéNia labele halo se ita taka ita-nia fuan ba domin ba ema seluk.
Virjen Maria tulun ita atu sai ba beibeik konxiente kona-ba perdaun nia gratuidade no grandeza ne’ebé ita simu husi Maromak, atu sai mizerikordiozu hanesa Nia, Aman di’ak, neineik atu hirus no boot iha domin.
