Fuiloro – Iha loron Domingu 28 Setembru 2014 ilas Krús Joven no Nain Feto hahu vizita husi Tutuala, hafoin lao tuir estasaun sira ne’ebe hola parte ba misaun Fuiloro nian too ikus tama mai too iha Sentru Fuiloro iha loron 30 setembru 2014 lokraik. Iha Bairu ida-idak sarani sira hein ho fuan kontente tanba ida nee eventu ne’ebe uniku liu. Tuir Nai lulik sira nia preparasaun ba sarani sira molok atu simu Krús ho Nain Feto nia ilas, iha Motivu ruma principal mak hanesan:
- Tinan ne’ebe mai sei selebra tinan atus lima fiar katolika ne’ebe ita simu ba dala uluk.
- Nai mai vizita nia povu kiik sira ne’ebe hela dook
- Renova fila fali povo sarani sira nia fiar nune’e bele hametin liutan fiar iha Nai Jesus
Iha kalan sarani sira husi estasaun Fuiloro nian halo velada kalan tomak hodi reza tersu tuir bairu ida-idak.
Iha dader tuku 9.00 misa enceramentu ba Krús Joven ne’ebe preside husi Padre Antonio Transfiguração, SDB hamutuk ho Padre Paroco Lospalos Padre Agapito Alfredo SDB.
Iha Padre Transfiguração ninia omilia, nia koalia kona ba renovasaun ba fiar sarani ne’ebe oras nee sai fraku liu. Iha tinan preparasaun ida ne’e ita presisa halo revolusaun mental ba ita nia fiar hodi sai ema foun iha Kristu. Ita nudar sarani hatudu identidade los nudar Kristaun ne’ebe fiar iha Maromak e Maromak mak sai ita nia esperansa lolos.
Remata tiha Selebrasaun Eukaristia iha meudia, Krús Joven ho Nain Feto nia ilas entrega fila fali husi Sentru Fuiloro ba Parokia Lospalos.
