Papa Francisco nia katekeze – 29 Janeiru 2014
RV – Iha audiénsia jerál, kuarta 29 Janeiru nian, Papa Francisco konsentra nia hanorin iha Sakramentu Krisma; Hodi fó kontinuidade ba siklu katekeze kona-ba sakramentu sira, Santu Padre destaka importánsia konfirmasaun nian, ne’ebé hamutuk ho Batizmu no Eukaristia, forma inisiasaun sarani.
Asesu Katekeze ho lia-portugés
Francisco esplika katak Krisma signifika unsaun, no, defaaktu, ho mina sagradu ne’ebé simu iha sakramentu ne’e, ema hetan konfirmasaun iha kbiit Espíritu Santu nian.Ne’e mak sakramentu ida ne’ebé lori ema ba kreximentu iha grasa batizmál, kumpre ninia ligasaun ho Igreja no haraik kbiit ba ema atu haklaken no defende fé/fiar. Tanba ne’e, Francisco defende importánsia atensaun nian atu joven sira simu sakramentu ne’e.
“Ita karik ladún iha kuidadu atu sira simu Krisma, no hela iha dalan klaran. Sakramentu ne’e importante iha vida sarani, tanba haraik kbiit mai ita atu bá oin”, Francisco hateten, hodi husu atu halo buat hotu posivel atu remata inisiasaun sarani ne’e.
No atu simu Krisma presiza preparasaun di’ak, Papa dehan. Nia fó hanoin katak konfirmasaun, nune’e mós sakramentu seluk, la’ós obra ema nian, maibé Maromak nian, ne’ebé tau matan ba vida umana. Nia hatama iha ema Ninia Espíritu Santu.
“Bainhira ita simu Espíritu iha ita-nia fuan no husik Nia atua iha ita, Kristu rasik sai prezente iha ita no foti forma iha ita-nia moris. Liuhusi ita, Kristu rasik harohan, fó esperansa no konsolasaun, kria komuñaun, kuda dame. Imi hanoin oinsá buat ne’e importante tebes”.
Francisco taka katekeze hodi husu sarani sira atu hanoin katak sira simu sakramentu ne’e no agradese ba grasa ida-ne’e, aleinde husu Maromak nia tulun atu moris nu’udar sarani loos.
Remata katekeze, iha saudasaun sira, Amu-Papa husik apelu ida atu bele iha serbisu ba ema hotu. Nia husu atu halo esforsu posivel hotu atu serbisu sai preokupasaun sentrál ema hotu nian. “Atu la kuran serbisu, basá nia mak hun dignidade nian!”.
