Dili – Enkontru Ir. Maria Nieves ho Juniora sira, hala’o iha loron 06 – Agostu-2019, iha sentru Formasaun João Paulo II, Comoro Dili. Irmán juniora sira ne’ebé partisipa husi komunidade hotu iha, inklui mos Komunidade Bonkodi no Palla. Enkontru ho Ir. Nieves aprezenta kona ba Orientasaun ba etapa formative junioradu nian. Hahu ho perguntas ne’ebé reflete no fahe hamutuk iha grupu, ne’ebé koalia kona ba esperiénsia ne’ebé hala’o dadaun iha etapa junioradu no oinsá no se mak akompaña iha etapa ida ne’e, modalidade ne’ebé grupu uza atu hatan ba pergunta rua ne’e mak, espresa liu husi dezeñu no sintezi badak. Hafoin aprezentasaun grupu nian madre kontinua hodi esplika kona ba finalidade no objetivu husi etapa junioradu; atu assume no inkultura ho responsabilidade no docibilitas iha itineráriu formativu, atu selebra ksolok prezensa no kontribuisaun ba karisma, agradese ba juniores sira nia prezensa iha Institutu, juniores sira mak futuru ba Institutu, maibé hahu tempu prezente, presiza la’o hamutuk ho Irmán perpétua no Irmán ferik sira, ita la’o hamutuk hodi lori ba oin karizma Institutu nian, la’os depende de’it ba ferik sira ka joven sira de’it maibé faz forsa hamutuk iha diversidade nia laran hodi luta ba oin. Madre hatutan tan katak; 
buat ne’ebé importante mak fahe buat ne’ebé imi nia esperiénsia, metin iha Jezús nia liafuan, imi nia evidensia diversidade nian, liafuan ne’e todan maibé nu’udar rikusoin ne’ebé ita bele aprende atu komprende valor ne’ebé ema seluk lori.
Pontu balun ne’ebé interesante tebes, mak aprezenta kona ba hilin ne’ebé simu no assume ho gratidaun fafurak atu moris nu’udar feto konsagrada- edukadora, foka oituan kona ba esperiénsia ne’ebé oferese posibildade atu haburas amizade ne’ebé livre, kle’an no tahan kleur iha nivel jerasaun no interjerasaun, nune’e madre hateten katak amizade mak prezente ka don husi Maromak, nune’e presiza tau matan, amizade ne’ebé nia fonte mak Jezús, halo ema livre, tan ita nia fuan simu bolun atu hadomi ema hotu, nune’e se karik iha moris komunidade mak iha ema balun ne’ebé sai nu’udar forsa ezérsitu atu kontrola de’it ema seluk nia moris karik, ida ne’e la’os atetude Saleziana ida, presiza husik ema livre iha nia moris.
Tuir mai iha Irmán balun ne’ebé espresa sira nia ideia kona ba enkontru ne’ebé hala’o ho Irmán Nieves:
• Ha’u Irmán Martinha, FMA komunidade Palla Sumba, loron ida ne’e importante tebes mai ha’u liuliu inkontru ho Ir. Nieves, husi enkontru ida ne’e ha’u sente kontente agradese, tanba Madre esplika klean mai ami kona ba dokumentu Orientasaun ba etapa junioradu nian. Buat ne’ebé presiza liu iha ha’u nia moris nu’udar junior ida mak fo importansia ba ha’u nia esperiénsia loron-loron nian, iha moris orasaun nian atu mantein relasaun metin iha Jezús no mos ksolok hamutuk iha moris diversidade nian iha komunidade. Nune’e nudar empeñu ba ha’u mak hakas-an atu moris, asimila no konfronta ha’u nia-an liu husi dokumentu ida ne’e. nu’udar juniores ha’u presiza nafatin akompañamentu hodi asumi responsabilidade nu’udar ha’u nia autoformasaun pessoal nian iha moris loron-loron nian.
• Ir. Lurdes,FMA husi formasaun ne’ebé ha’u simu direitamente husi Me. Nieves ha’u sente kontente no agradese. Buat ne’ebé dada ha’u nia atensaun mak madre nia liafuan hahu nian ne’ebé dehan “ ita mai tuir enkontru ida ne’e la ho buat ne’ebé mai husi ita nia ideia de’it, maibé ho buat ne’ebé ita rasik iha, tan Maromak pronto atu rona buat ne’ebé mai husi ita nia laran, lao’s iha liur ka leten de’it. Nune’e bele dehan enkontru ida ne’e tulun ha’u atu sai responsabel ba ha’u nia autoformasaun rasik.
• Ir. Domingas da Silva, buat ne’ebé sai nu’udar empeñu ba ha’u mak madre nia liafuan ne’ebé dehan laos teoria de’it maibé fahe ho esperiénsia rasik no la’o hamutuk ho orasaun no adorasaun, nune’e enkontru ida ne’e sai nu’udar naroman ida, no mos avaliasaun ida mai ha’u nia etapa junioradu nian.
• Ir. Engracia, ba ha’u foin primeira vez tuir enkontru ida ne’e iha etapa juniora nian, bele dehan madre nia liafuan sira tulun tebes ha’u , hanesan rikusoin ida ne’ebé bele konfronta-an bebeik hodi moris ho docibilitas, dokumentus ida ne’e sai nu’udar ami nia matadalan atu bele assume didiak ho responsabilidade no ksolok.
(Maria Sarmento Guterres)
