Papa Francisco iha Angelus 22 Juñu 2014
Maun no biin-alin sira, bondia!
Iha Itália no iha País barak seluk iha domingu ne’e selebra festa Kristu nia Isin no Raan – dalabarak uza naran latin: Corpus Domini eh Corpus Christi. Komunidade ekleziál halibur haleu Eukaristia atu adora rikusoin folin liu ne’ebé Jezús husik hela ba nia.
Evanjellu João nian aprezenta diskursu kona-ba “paun moris nian”, ne’ebé Jezús halo iha sinagoga Cafaranaum nian, iha ne’ebé Nia afirma: «Ha’u mak aihan moris nian ne’ebé tuun mai husi lalehan. Ema ne’ebé han aihan ne’e, nia moris ba nafatin; no aihan ne’ebé Ha’u sei fó mak Ha’u nia isin, saran ba mundu nia moris» (Jo 6,51). Jezús subliña katak Nia la mai iha mundu ne’e atu fó buat ruma, maibé atu fó nia An rasik, nia moris, nu’udar aihan ba sira ne’ebé iha fiar iha Nia. Ita-nia komuñaun ho Na’i empeña ita, nia dixípulu sira atu banati tuir Nia, halo ita-nia ezisténsia, ho ita-nia atitude sira, paun ida silu fahe ba ema seluk, hanesan Mestre silu paun ne’ebé nia isin tebes duni. Mai ita fali, iha komportamentu laran-luak nian ba maluk mak hatudu atitude silu moris ba ema seluk.
Bainhira ita partisipa Santa Misa no habosu an ho Kristu nia Isin, Jezús no Espíritu Santu nia prezensa serbisu iha ita, plasma ita-nia fuan, komunika mai ita atitude interiór sira ne’ebé tradús iha komportamentu tuir Evanjellu. Uluknanai dosilidade ba Maromak nia Liafuan, hafoin fraternidade entre ita, korajen sasin sarani nian, fantazia karidade nian, kapasidade atu fó esperansa ba ema lakon konfiansa, simu ema ezkluzu sira. Ho forma ne’e, Eukaristia halo sai tasak estilu ida moris sarani nian. Kristu nia karidade, ne’ebé ita simu ho fuan nakloke, muda ita, transforma ita, halo ita iha kbiit atu hadomi la’ós tuir ema nia sasukat, nafatin limitada, maibé tuir Maromak nia sasukat. No sá loos Maromak nia sasukat? Lahó sasukat! Maromak nia sasukat mak la iha sasukat. Buat hotu! Buat hotu! Buat hotu! Ita labele sukat Maromak nia domin: lahó sasukat! Entaun ita hetan kbiit atu ita bele hadomi mós ema ne’ebé la hadomi ita: no ida-ne’e la’ós fasil. Hadomi ema ne’bé la hadomi ita… la’ós fasil! Tanba se ita hatene katak ema ruma la hadomi ita, ita mós iha tendénsia atu la hadomi nia. No loloos lae! Ita tenke hadomi mós ema ne’ebé la hadomi ita! Opoin buat aat ho di’ak, perdua, partilla, simu. Tanba Jezús no Ninia Espíritu, ita-nia moris mós sai “paun silu fahe” ba ita-nia maun-alin sira. No hodi moris nune’e ita deskobre ksolok loos! Ksolok atu sai don, atu troka don boot ne’e ita simu molok, lahó ita-nia méritu. Furak tebes: ita-nia moris sai don! Ida-ne’e katak banati tuir Jezús. Ha’u hakarak fó hanoin buat rua ne’e. Primeiru: Maromak nia domin nia sasukat mak hadomi lahó sasukat! Buat ne’e klaru? No ita-nia moris, ho Jezús nia domin, hodi simu iha Eukaristia, sai don. Hanesan akontese ho Jezús nia moris. Keta haluha buat rua ne’e: Maromak nia domin nia sasukat mak hadomi lahó sasukat. No hodi tuir Jezús, ita, ho Eukaristia, halo ita-nia moris don ida.
Jezús, Paun moris rohan-laek nian, tuun husi lalehan no sai isin tanba Maria Santíssima nia fiar. Lori tiha Nia ho domin boot, Maria tuir Nia ho fidelidade to’o krús no moris-hi’as. Ita husu Na’i-Feto atu tulun ita deskobre filafali beleza Eukaristia nian, atu halo nia sai sentru ita-nia moris nian, espesialmente iha Misa domingu nian no iha adorasaun.
