RV – Ko’alia ba peregrinu sira, Papa Francisco reflete kona-ba devosaun ba ‘Menino Jesus’, protagonista prezépiu iha loron Natál. Santu/a barak kuda devosaun ne’e, hanesan porezemplu Santa Teresa de Lisieux, ne’ebé nu’udar monja karmelita hili naran Teresa do Menino Jesus. Nia hatene moris “infância espiritual” ne’ebé asimila hodi medita Maromak nia umildade hodi sai ki’ik-oan hanesan ita.
“Ne’e mistériu boot ida, Maromak haraik-an! Ita ema foti-an, nakonu ho vaidade no hnoin ema boot, i ita ne’e folin-laek! Nia boot, umilde no halo an labarik. Ne’e mistériu tebes duni!”, Amu-Papa hateten, hodi hatutan katak Jezús nia moris iha rai mak revelasaun no ensinamentu, basá nia mate no moris-hi’as mak espresaun aas liu ninia domin ne’ebé salva.
Atu buras iha fiar, Papa Francisco afirma, presiza kontempla beibeik ‘Menino Jesus’, maski ita hatene uitoan de’it kona-ba ninia infánsia: aprezentasaun Templu no vizita Liurai na’in tolu nian, hafoin haksoit liu ba Jezús ho Maria no José ba Páskua. Maski nune’e, ita bele aprende barak husi nia moris sei ita haree ba oinsá labarik nia moris, nia dehan.
Uluknanai, sira hakarak ita-nia atensaun no presiza ida-ne’e atu sente protesaun: “Nesesáriu mós mai ita atu koloka Jezús iha ita-nia moris nia sentru i, maski hanesan paradoksál, hatene katak ita iha responsabilidade atu proteje nia. Nia hakarak hela iha ita-nia liman laran, hakarak ita tulun nian no bele ho nia matan fihir ita-nian”.
Ikusmai, labarik sira gosta halimar no, tan ne;e, presiza husik ita-nia lójika atu tama iha lójika infantíl. Ne’e mak ensinamentu ida.
“Iha Jezús nia oin ita simu bolun atu abandona ita-nia pretensaun autonomia nian – ne’e mak núkleu kestaun nian -, atu akolle forma liberdade loos nian, ne’ebé konsiste iha hatene sé mak iha ita-nia oin no serví nia: nia mak Maromak Oan. Nia mai atu hatudu mai ita Aman nia oin domin no mizerikórdia nian. Ita tau ita-nia an iha ninia servisu”, Papa Francisco husu.
Atu remata, Papa Francisco husu atu, bainhira sarani sira fila ba uma hakbesik ba prezépiu no rein ‘Menino Jesus’, hodi husu grasa tuirmai ne’e: “Jezús, ha’u hakarak sai haraik-an hanesan ita, haraik-an hanesan Maromak”.
